भांगरभूंय | प्रतिनिधी
पणजीः वेंचणूक लागीं पावतकच अळम्यां भशेन पत्रकार तयार जातात. मोबायल घेवन भोंवचे परस यंत्रणे भितर येवचें. गुजान अभ्यासक्रम सुरू करचो आनी हे यंत्रणे वरवीं पत्रकार तयार करचे. सरकार फावो तो तेंको दिवपाक तयार आसात, अशें आस्वासन मुख्यमंत्री डॉ. प्रमोद सावंत हांणी दिलें.
गोंय श्रमीक पत्रकार संघटणेच्या (गुज) पत्रकारिता पुरस्काराचें मुख्यमंत्र्यां हस्तुकीं वांटप जालें. मिनेझीस ब्रागांजा सभाघरांत जाल्ले हे कार्यावळींत मुख्यमंत्री डाॅ. सावंत मुखेल सोयरे म्हण उलयताले. ह्या वेळार गोंय साधन सुविधा उदरगत म्हामंडळाचे अध्यक्ष मायकल लोबो, राजदीप बिल्डर्सचे चेअरमन राजेश तारकार, पंचामृत उद्देगाचे वेवस्थापकी संचालक जंबू होसमानी आनी गुजचे अध्यक्ष राजतिलक नायक हाजीर आशिल्ले.
ह्या वेळार ‘गोवन वार्ता’चे दक्षीण गोंय ब्युरो चिफ अजय लाड आनी खेळां पत्रकार सचिन दळवी आनी हेर पत्रकारांक मानेस्तांचे हस्तुकीं उत्कृश्ट पत्रकारितेचो पुरस्कार भेटयलो.
पत्रकारिता हो लोकशायेचो चवथो खांब आनी पत्रकारांनी आपली पत्रकारिता ही पोटतिडकीन करची, अशें मत मुख्यमंत्र्यान मांडलें.
वेचणुकेंक दोन म्हयने आसतना अळम्यां भशेन पत्रकार तयार जातात आनी वेंचणूक सोपले उपरांत आपल्या दुसर्या कामा- धंद्याक लागतात. पत्रकारिता मळावेले व्हडले प्लॅयर आनी इंडस्ट्रीन हाचेर नियंत्रण हाडपाक जाय. कोणय मोबायल घेवन पत्रकार जाता आनी भाशणां करता. सगळ्याक विस्वासांत घेवन ह्यो गजाली जाग्यार घालपाक जाय, असो उलो मुख्यमंत्र्यान मारलो.
जर हें आतांच जाग्यार घालें ना जाल्यार पत्रकारितेक आनी राजकारणाक हें घातक थारतलें. जे नवे बरे पत्रकार आनी जे स्थायीक जाल्ले पत्रकार आसात तांची जीण कठीण जातली. देखून पत्रकारांची चाचपणी करून वळेरी दिवची आनी उपरांत जे लोक हे वळेरेंत नात तांकां कुशीक दवरपाक आमी आमदारांक सांगतले, अशें मुख्यमंत्र्यान म्हणलें.
बेश्टे मोबायल घेवन पत्रकारिता करूं नाकात, यंत्रणे भितर येयात. आमी तुमकां मजत करपाक तयार आसात. हे खातीर गुजान स म्हयन्यांचो पत्रकारिता अभ्यासक्रम तयार करचो. कुशळटाय उदरगत संचालनालया वरवीं हाचेर आराखडो तयार करपाक सांगता. फुडाराक जे पत्रकार येतले ते हे यंत्रणेंतल्यान येवचे. जाका लागून दीर्घकाळा खातीर ते पत्रकारिता मळार उरतले, अशें मुख्यमंत्र्यान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
