भांगरभूंय | प्रतिनिधी
पणजीः येता त्या तीन म्हयन्यां भितर सगळे मुंडकार खटले १०० टक्के निकालांत काडटले. जमीन नांवार नाशिल्ल्या फ्लॅट धनयांक मालकी हक्क दिवपा खातीर रोखडीच म्हजी फ्लॅट येवजण हाडटले, अशी घोशणा मुख्यमंत्री डॉ. प्रमोद सावंत हांणी केली.
म्हजें घर येवजणे खाला उत्तर गोंयच्या सुमार एक हजार लावर्थ्यांक मुख्यमंत्री हस्तुकीं घराच्या मालमत्तेच्यो सनदी वाटल्यो. पणजे इन्स्टीट्यूट मिनेझिस ब्रांगाझाच्या हॉलांत जाल्ले कार्यवळींत मुख्यमंत्री उलयताले. ह्या वेळार महसूल मंत्री बाबूश मोन्सेरात, पर्यटन मंत्री रोहन खंवटे, नुस्तेमार मंत्री निळकंठ हर्ळणकार, राज्यसभा खासदार सदानंद शेट तानावडे, उत्तर गोंय जिल्लोधिकारी अंकीत यादव, महसूल सचीव संदीक जॅकीस आनी हेर आमदार हजर आशिल्ले.
ह्या वेळार उलयतना मुख्यमंत्र्यान सांगलें, मुंडकारी खटलो जरी चालू आसलो तरी लेगीत मुंडकाराक अर्ज केल्यार सनदय मेळटा आनी तांचें घर लेगीत नियमीत जाता.
बरेच जाण मुंडकारांचे जागेंत आसात मात कांय जाणांनी मुंडकार कायद्या खाला अर्ज करूंक नात. अशें आसून लेगीत जर तांणी सनदीक अर्ज केला आसत जाल्यार तांकां सनदय मेळटा आनी घर नियमीत करपा खातीर अर्ज केला आसत जाल्यार ताचें घर लेगीत कायदेशीर जाता. मागीर मुंडकार हक्का खाला जमनीचो मालकी हक्क सासणा खातीर मेळोवपाक शकता, अशी म्हायती मुख्यमंत्र्यान दिली.
फुडल्या तीन म्हयन्यां भितर जितल्या मुंडकारांचींं प्रकरणां प्रलंबीत आसल्यार तीं सगलीं निकालांत काडपाचें आमी थारायलां. एकान एक मुंडकार खटले निकालांत काडटले आनी तांच्या नांवार घरां जातलीं, अशें आस्वासन मुख्यमंत्र्यान दिलें.
म्हजो फ्लॅट म्हण आमी नवीन येवजण घेवन येतात. कितलेशेच बिल्डर आनी सोसायटी आसतल्यो तांणी फ्लॅट बांदले आनी विकले पूण फ्लॅटाचे डॉक्युमेंट दिवंक ना. सगळे डॉक्युमेंट जमीन धनयांच्या नांवाचेर आसात आनी बिल्डरान ताका फकत सेल डीड दिल्या. मात आयज तो फ्लॅट दुरूस्त करपाक वा इमारत मोडून नवी बांदपाक मेळना, अशें मुख्यमंत्र्यान सांगलें.
म्हणून जमीन धनी वा बिल्डर आयलो ना आसत जाल्यार सुध्दा ते सोसयाटीक वा पुराय इमारतीक मालकी हक्क दिवपाचें काम म्हजो सरकार करतलें. हे खातीर म्हजो फ्लॅट ही येवजण चालीक लावपाची म्हजी तयारी आसा, अशें उतर मुख्यमंत्र्यान दिलें.
१९७२ पयलींचीं घरां पुर्तुगेज काळांत बांदिल्लीं. तेन्ना तलाठी आनी सर्वेक्षण जाय नासलें. मात पुर्तगेज गेले उपरांत तांचेकडे कसलीच कागदपत्रां नासलीं. मात जेन्ना ते घर दुरूस्त करपाक वयता तेन्ना ते घर पट्टी शुल्काची पावती घेवन वतात. तेन्ना पंचायीतीचो सचीव तांचे कडेन कागदपत्रां मागता, अशें मुख्यमंत्र्यान म्हणलें.
देखून पंचायती सचिवान घरांक काम बंद उडोवपाची नोटीस काडचे पयलीं सात खेपे विचार करपाक जाय. नोटीसो काडचे पयलीं जिल्लोधिकार्यांचो सल्लो घेयात. जर तांचें घर नांवार ना जाल्यार ते डोक्युमेंट हाडटले कशे हाचो विचार सचिवान करपाक जाय. पोरणें घर सामान्य गोंयकारांक परत बांदपाक मेळना जाल्यार ताचो फायदो कितें? अशें म्हणीत मुख्यमंत्र्यान सचिवांचे कान ओडले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
