भांगरभूंय | प्रतिनिधी
एक काळ असोय आसलो जेन्ना लोक, खासा करून तरणाटी पिळगी डिजिटल साधनां आनी सोशल मिडिया आपणावपाक सर्त करतालीं. पूण आतां चित्र बदलत आसा. डिजिटल साधनां, चड स्क्रीन वेळ आनी सेगीत ऑनलायन आयिल्ल्यान लोक डिजिटली थकल्यात.
भारत, अमेरिके सयत जायत्या देशांनी केल्ल्या वेगवेगळ्या सर्वेक्षणां प्रमाण नवी पिळगी सेगीत अधिसुचोवण्यो, सोशल मिडिया आनी डिजिटल थकवा पसून सुटका मेळोवपा खातीर ‘डिजिटल मिनिमालिझम’ आपणायता. कांय जाण विनायल रेकॉर्ड, सीडी आनी रेकॉर्ड प्लेयर विकतें घेतात. कांय लोक २००० च्या दसकांतले पोरणे मानपी फ्लिप फोन वा किपॅड आशिल्ले फिचर फोन वापरतात.
बॉलिवूड आनी हॉलीवूडांतले जायते सेलिब्रिटी डिजिटल डिटॉक्स घेतात. कांय सेलिब्रिटींनी सोशल मिडिया खातें लेगीत सोडलां. जायत्या देशांच्या सरकारांनी विद्यार्थ्यां खातीर स्क्रीन वेळ मर्यादीत करपा खातीर नेम केल्यात. भारतांतूय अशे उपक्रम चालीक लायतात. कर्नाटकान विद्यार्थ्यां खातीर मनरिजवणे संबंदीत स्क्रीन वेळ दिसाक एक वर मेरेन मर्यादीत करपाचो प्रस्ताव मांडला. चंडीगढान ‘संडे अनप्लग टू रिकनेक्ट’ ही मोहीम सुरू केल्या.
म्हत्वाच्या खिणां वेळार डिजिटल साधनां पसून पयस रावप कुटुंबांक जोडपाक प्रभावी थारता
विवो-सीएमआर स्विच ऑफ अभ्यास २०२५ – विवो इंडिया आनी सीएमआर हांणी केल्ल्या वर्सुकी स्वीच ऑफ अभ्यासाच्या ताज्या आंकड्यां प्रमाण लोक डिजिटल साधनां पासून पयस वतात. स्वीच ऑफ अभ्यासाच्या सोदांतल्यान दिसून येता की कुटुंबां म्हत्वाच्या खिणांनी डिजिटल डिस्कनेक्ट करपाचो पर्याय घेतात अशें विव्हो इंडियाचे कॉर्पोरेट कम्युनिकेशन्स ऑफिसर गीतज चन्नाना सांगतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
