भांगरभूंय | प्रतिनिधी
अामचे लागींचे लोक एक दीस आमकां सोडून वतले, हें आमकां खबर आसूनय आमी तांचे कडेन आडनदर करतात. पूण तो एक दीस उजवाडटा, जेन्ना ह्या अमर सत्याची प्रचिती येता.
हालींच सकाळीं म्हाका खबर कळ्ळी, अजित गणपत केरकार (72) हे सतत क्रियाशील, हांसरे आनी कसल्याय कामा खातीर तत्पर आशिल्लें व्यक्तिमत्व आतां आमचे मदीं नात. ही बातमी आयकून म्हज्या काळजाक व्हडलो धक्को बसलो.
हांव नागेश देवस्थानाचो अध्यक्ष म्हणून काम करतना, म्हाका तांच्या कार्याचें लागींच्यान दर्शन जाल्लें. फोंडें वाठारांत एक व्यासंगी नाट्यकर्मी आनी कलाकार म्हणून तांची नामना आशिल्ली. तांच्या अभिनयाची छाप जनमानसाचेर पडिल्ली. ते फक्त बरे नाट्यकर्मीच न्हय, तर एक उत्कृश्ट निवेदकूय आशिल्ले. गेली अनेक वर्सां तांणी आपणाक सामाजिक कार्यांत झोकून दिल्लें. बांदोडेंच्या नागेश देवस्थानाचे ते आदले सचिव. तशेंच ‘राजीव गांधी कलामंदिरा’चे ते आदले उपाध्यक्ष.
वेवसायान शिक्षक आशिल्ल्यान, शिक्षकाची तळमळ घेवन तांणी आपली सामाजिक जापसालदारकी निभयली. चैत्र पौर्णिमेच्या पालखी उत्सवांत तांणी केल्लें निवेदन आजूय लोकांच्या लक्षांत आसा. अचकीत सोडून गेल्ल्या अजित केरकार हांच्या मरणाची अजून म्हज्या मनाक टोचणी लागून उरल्या. तांचे यादीक ही भावपूर्ण पुश्पांजली. हें दुख्ख सोंसपाची तांक नागेश देवान, महालक्ष्मी देवीन तांची धर्मपत्नी शांता, पुत्र हेरंब आनी भाव शंभूनाथ शेणवी केरकार हांकां दिवची, अशी हांव प्रार्थना करतां.
दामोदर बाळकृष्ण भाटकार
आदले अध्यक्ष, श्रीनागेश देवस्थान, बांदोडें, 9225989111
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
