भांगरभूंय | प्रतिनिधी
निकश निश्चीत करून उमेदवारी जातली निश्चीत : दामू नायक
पणजी : केंद्र आनी राज्य सरकारच्या कल्याणकारी येवजण्यांचो प्रसार आनी प्रचारावरवीं संघटणा घटमूट करपाचेर आमचो भर आसतलो. विधानसभा वेंचणुकेंत कांय निकश निश्चीत करून उमेदवार निश्चीत जातलें, अशें प्रदेश भाजप अध्यक्ष दामू नायक हांणी सांगलें.
आयतारा दामू नायक हांणी दिल्लीक पक्षाचे राष्ट्रीय सरचिटणीस बी. एल. संतोष हांची भेट घेवन तांकां कृती आराखडो २०२७ सादर केलो. २०२७ची वेंचणूक नदरेमुखार दवरून संघटणेचें कार्य फुडें व्हरपा सयत ती घटमटू करपा खातीरच्या उपक्रमांचो कृती आराखड्यात आस्पाव आसा. मात पक्षान तो गुपीत दवरला. ताची कार्यवाही सुरू जातली, अशें कृती आराखड्याविशीं उलयतना तांणी सांगलें.
सगल्या मतदारसंघांत पक्षाचें कार्य सुरू आसा. आतां परतून दरेकी मतदारसंघांत मेळावे तशेंच बसका जातल्यो. हाचे उपरांत त्या, त्या मतदारसंघांतल्या पदाधिकार्यांकडेन उलोवन राजकी स्थितीचो नियाळ घेतले. मतदारसंघांत पुराय जाल्लीं कामां, प्रलंबीत कामां हांचो हातूंत आस्पाव आसतलो. कल्याणकारी येवजण्याची कार्यवाय, तांचो प्रसार हो व्हडा प्रमाणांत जातलो. उदरगतीचीं कामांं तशेंच मतदारसंघांतल्या राजकी स्थितीचो नियाळ हो नियमीत घेतलो वतलो. विधानसभेंत उमेदवारीविशींचो निर्णय राज्य पावंड्यावेले फुडारी आनी पक्षाचे संसदीय मंडळ घेतले. उमेदवारीविशीं कांय निकश तयार जातले. कामगिरी, पक्षाविशींची निश्टा आनी जिंकून येवपाची तांक हाचो विचार करून उमेदवारीविशीं निर्णय जातलो, अशें तांणी सांगलें.
#Goa #GovernmentSchemes #GoaGovernment #GoaMinister #DamuNaik #NewsInKonkani
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
