भांगरभूंय | प्रतिनिधी
पणजी : संवसारीक आव्हानां आसूनय फाटल्या एका वर्सान गोंयच्या जाल्ल्या अभियांत्रिकी उत्पादनांच्या निर्यातींत ३६ टक्क्यांनी वाड जाल्या. ल्हान राज्य जरी आसलें तरी वखदां, रसायनां, शिपींग, अभियांत्रिकी उत्पादन निर्यातींत गोंयचें योगदान व्हड आशिल्ल्याचें मुख्यमंत्री डॉ. प्रमोद सावंत हांणी सांगलें. सोमारा पणजी केंद्रीय वाणिज्य खात्या वतीन आयोजीत कार्यावळींत ते उलयताले. ह्या वेळार आदले केंद्रीय मंत्री सुरेश प्रभू, खात्याचे सहसचीव विमल आनंद, पंकज चड्डा, अश्विन गोलपकर आनी हेर अधिकारी हाजीर आशिल्ले.
गोंय फकत सन, सॅन्ड आनी सी पुरतें मर्यादीत उरूंक ना. पर्यटना वांगडा हेर उद्देगीक वाठारांतूय गोंय मुखार येता. अर्थीक वर्स २०२४- २५त गोंयच्यान ४०८ दशलक्ष युएस डॉलरांचीं अभियांत्रिकी उत्पादनां निर्यात जाल्लीं. २०२५- २६त तातूंत वाड जावन ताची किंमत ५५० दशलक्ष डॉलर जाली. गुंतवणूकदारांचो वाडपे विस्वास, कुशळ मनीसबळ आनी गोंयांत सुदारपी उद्देगीक मळाक लागून हें शक्य जालां. शिपींग, इलेक्ट्रॉनिक्स उत्पादनांच्या निर्यातींतय गोंय पश्चीम विभागांत मुखार सरता, अशें मुख्यमंत्र्यान म्हणलें.
राज्य सरकारान उद्देगीक क्षेत्रा खातीर वेगवेगळ्यो येवजण्यो हाडल्यात. दयारच्या मार्गान निर्यातीक उबार मेळचे खातीर आमी यत्न करतात. गोंयांत पांचव्या आनी टिकावू उद्देगांक प्राधान्य दितात. भाजपा सरकाराच्या काळांत सुरू केल्ल्या मेक इन इंडिया, ग्रो इन इंडिया, स्टार्ट अप, मुद्रा रीण येवजण अशा वेगवेगळ्या उपक्रमांक लागून उद्देगीक मळ चालीक लागलां. हाका लागून फाटल्या बारा वर्सांत देशाची निर्यातय वाडल्या. फाटल्या एका अर्थीक वर्सा देशांतल्या अभियांत्रिकी उत्पादनांची निर्यात ४ टक्क्यांनी वाडल्या. भारताच्या वट्ट निर्यातींत एमएसएमई क्षेत्राचो १६ टक्के वांटो आसा, अशेंय तांणी म्हणलें
नवे बाजार सोदचे
सुरेश प्रभू हांणी, देशांतल्या निर्यातदारांनी परंपरीक बाजारां सयत नवे बाजार सोदप गरजेचें. हे खातीर केंद्र सरकार सगले तरेची मजत करपाक तयार आसा. ऑक्टोबर म्हयन्यांत गोंयांत व्हायब्रंट गोंयचें आयोजन केलां. देशभरच्या उद्देजकांनी हातूंत वाटो घेवचो, असो उलो तांणी मारलो.
#Goa #GoaChiefMinister #DrPramodSawant #GlobalChallenges #NewsInKonkani #Panjim
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
