भांगरभूंय | प्रतिनिधी
पणजी : फाटल्या ६ ते ८ म्हयन्यां सावन आमी आमच्या ‘रेजिनाल्डो ट्रस्ट’ वरवीं कुडतरी मतदारसंघांतले वेगवेगळे रस्ते, हायवे, शेतां आनी गटारांतलो कोयर एकठांय करतात. हो कोयर पावसा पयलीं वेळार एकठांय केलो ना जाल्यार लोकांक खूब त्रास सोंसचे पडटले. रस्त्यार आनी उक्ते सुवातेर कोयर उडोवपाची लोकांची प्रवृत्ती आजूनय बदलूंक ना. हाका लागून आतां रस्त्यार कोयर, सॅनिटरी पॅड्स वा डायपर्स उडोवप्यांक धरून तांचे वा तांच्या वाहनांचे फोटो काडून म्हज्या कार्यालयाक वा पंचायतीक धाडात. आमी संबंदीतांचेर खर दंडात्मक आनी कायद्यान वचून कारवाय करतले. मात कोणेंच तांचे कडेन स्वता वाद घालचो न्हय, असो उलो कुडतरचे आमदार आलेक्सो रेजिनाल्ड लॉरेन्स हांणी मारलो. मतदारसंघांतलो कोयर वेवस्थापन आनी सिवीक सेन्स भाशण करतना तांणी ही म्हायती दिली.
आमदार आलेक्सो रेजिनाल्ड हांणी, दर ८ ते १० दिसांनी मुखेल रस्ते, राय हायवे आनी आशिकुशीकच्या खुबश्या वाठारांतल्यान कामगारांचे मजतीन कोयर एकठांय करतात. सध्या कामगार मेळप कठीण जालां तरी ही मोहीम चालूच आसा. धक्को दिवपी गजाल म्हळ्यार फाटल्या कांय म्हयन्यांत एकठांय केल्ले वट्ट २.५ टन (अडीच टन) परस चड वापरिल्ले डायपर्स, पॅम्पर्स आनी सॅनिटरी पॅड्स कुंडयच्या एका प्रकल्पांत करारा खाला विलो लावपा खातीर धाडल्यात.
एक योग्य आनी खर कोयर वेवस्थापन प्रणाली पुरायेन लागू जायना, तो मेरेन आमी जनते कडल्यान कोयर एकठांय करपा खातीर कसलेच तरेचें शुल्क घेवचे नात, मात जनतेन समजुद्दारपणां दाखोवन कोयर मेळटा थंय उडोवपाचें थारावप, अशें आमदारांनी स्पश्ट केलें. हो सगलो खर्च सध्या स्वताच्या पांवड्यार ट्रस्टा वरवीं करता, मतदारसंघ नितळ आनी पांचवो दवरपा खातीर नागरिकांनी प्रशासनाक सहकार्य करप गरजेचें, अशी अपेक्षा तांणी उक्तायली.
गाडयेचो हारसो सकयल देंवोवन कोयर भायर उडोवं नाकात
नागरिकांचे सवयेंचेर खर तिडक उक्तायतना आमदारान म्हणलें, खुबशे जाण दुचाकीवेल्यान वतना कोयराच्यो पोतयो रस्त्या कुशीक उडयतात. जाल्यार कांय जाण गाडयेचो हारसो सकयल देंवोवन कोयर शेवटितात. ही चुकीची संवय आतां बंद जावपाक जाय. जर कोणाक रस्त्यार वा उक्तडार कोयर उडयतना दिसल्यार तांणी रोखडोच म्हज्या कार्यालया कडेन संपर्क करचो. आमी २ ते ३ दिसांनी तो कोयर उखलपाची वेवस्था करतले.
फोटो धाडात, पंचायत दितली दंड
कोयर उडोवप्यां कडेन सरळ वाद घालिनासतना नागरिकांनी कामा करचीं, असो उलो आमदारांनी मारलो. उक्तडार कोयर उडयतना दिसल्यार ताचो वा ताचे गाडयेचो नंबर प्लेटीचो फोटो काडून धाडचो. प्रशासन त्या वाहनाचो आनी मनशाचो सोद घेवन, संबंदीत पंचायतीं वरवीं तांचे कडल्यान व्हड दंड वसूल करतले आनी तांचे कडल्यानूच तो वाठारा नितळ करून घेतले. कुडतरी मतदारसंघ पुरायेन कोयरमुक्त, नितळ आनी पांचवो करपा खातीर जनतेन हे मोहिमेंत सक्रीय वाटो घेवचो, अशी मागणी तांणी निमाणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
