भांगरभूंय | प्रतिनिधी
आयचे संवसारीक परिस्थितींत रशिया- युक्रेन झुज आसूं वा अमेरिका- इझ्रायल आनी इराण संघर्श. अशा झुजांचो परिणाम फकत संबंदित देशांपुरतो मर्यादित उरिल्लो ना. समुद्रधुनी मार्ग बंद जाल्ल्यान संवसाराक ताचो परिणाम जाणवपाक लागला. इंधनाचे तुटीक लागून निर्माण जाल्ली स्थिती, हॉटेल वेवसायार आयिल्लें संकश्ट आनी शारां कडेन वाडिल्लें स्थलांतर हाका लागून जनजीवन विस्कळीत जालां. कांय जाणांक लाकडांचो वापर करचो पडलो. तर थोड्याक हाॅटेलां बंद दवरचीं पडलीं. अशा वेळार, रत्नागिरीचे इंजिनियर मनीष आपटे हांणी कोयरा पसून गॅस निर्मितीचो जो पर्याय सोदला, तो खूब मोलादीक आनी काळाची गरज असो आसा.
पर्यायी इंधनाचें म्हत्व केंद्रीय मंत्री भोवमानेस्त नितीन गडकरी सतत सांगत आसतात. महात्मा गांधीन म्हणिल्ल्या प्रमाण, “हे पृथ्वीचेर मनश्याच्या गरजो पुराय करपा खातीर फावोशी साधनसंपत्ती आसा, पूण मनशाची हाव केन्नाच सोंपना.” कोयर वेवस्थापनाचे बाबतींतय हेंच घडटा. आयज वाडत आशिल्ले लोकसंख्ये खातीर आनी पर्यटनाक लागून कोयराचो प्रस्न गंभीर जाला. गोंया सारक्या जाग्यार तर ही समस्या चडच बिकट जाल्या. कोयर विकूकय मेळना. तो दिसानदीस वाडत आसा. ताचो विलो लावपाक सरकारान साळगांवां प्रकल्प सुरू केला. गोंयांत हेर कडेनूय ते आसात. तरी लेगीत कोयर उरता. 16 लाख गोंयकार आनी ताचे दुपेटीन पर्यटक, मागीर कोयर जातलोच. कोयरा वयल्यान म्हापश्यांय हालींच एक प्रकरणूय गाजलें.
मनीष आपटे हे पेशान इंजिनिअर. ताणीं स्वताची नोकरी सोदून ‘रत्नाग्रीन’ (Ratnagreen) नावाची कंपनी स्थापन केल्या. तिचे वरवीं ते कोयर वेवस्थापना खातीर लागपी ल्हान- व्हड यंत्रां तयार करतात. ओलो आनी सुको कोयर वेगळो करून, ताचे पसून गॅस निर्मिती करपाचें तांचे तंत्रज्ञान सामकें प्रभावी आसा. तांचें हें यंत्र आयज गोंयांतलीं जायतीं आस्थापनां आनी पंचायती वापरतात.
कोयराचो वेवस्थित विलो लागूंक नाशिल्ल्यान भोंवतणी सुणीं जमा जावप, गोरवांनी तो कोयर खावप आनी तातूंतल्यान पातळपी दुयेंसां, अशो अनेक समस्या निर्माण जातात. ह्या कोयराचो मनशाकूय तसो उपेग ना. मनीष आपटे हांणी हाचेर खोलायेन संशोधन केलां. तांच्या मता प्रमाण, कोयर वेवस्थापनांत ‘वर्गीकरण, पुनर्वापर आनी पुनर्निर्मिती’ (Reduce, Reuse, Recycle) हें सूत्र पाळप अनिवार्य आसा. ओल्या कोयरा पसून सेंद्रिय सारें तयार जावंक शकता, जाल्यार प्लास्टिक, कागद, रबर हांच्या सारक्या सुक्या कोयराचो पुनर्वापर करूं येता. तशेंच, सॅनिटरी पॅड्स, इंजेक्शन सिरिंज वा इलेक्ट्रॉनिक कोयरा सारक्या घातक वस्तूंची शास्त्रीय पद्धतीन विल्हेवाट लावप गरजेचें.
श्री. आपटे हांचे हें कार्य फकत एक स्टार्ट- अप न्हय, तर ते पर्यावरणाचे रक्षण आनी रोजगाराची संद निर्माण करपी एक पावल आसा. कोयरांतल्यान ऊर्जेची निर्मिती करून ताणीं एक आदर्श घालून दिला.
चड म्हायती खातीर वा संपर्का खातीर तुमी सकयल दिल्ल्या पत्त्यार संपर्क सादूं शकतात.
संपर्क क्रमांक: 8390925402, ईमेल : [email protected]
डाॅ. रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
