भांगरभूंय | प्रतिनिधी
२०२७ चो कृती आराखडो केंद्रीय नेतृत्वाक सादर
पणजी : राज्यांत सगळ्या राजकी पक्षां कडल्यान वेंचणुकेची तयारी सुरू आसतना भाजपान एक पावल फुडें वतना २०२७ चो कृती आराखडो केंद्रीय नेतृत्वाक सादर केलो. विधानसभा वेंचणूक तशेंच पक्षाच्या संघटनात्मक वावरा विशीं राष्ट्रीय सरचिटणीस बी. एल. संतोष हांचे कडेन हांवें चर्चा केली अशी म्हायती प्रदेश भाजप अध्यक्ष दामू नायक हांणी दिली. बेगीनुच केंद्रीय गृहमंत्री अमित शहा हांची एसटी आरक्षण कार्यवाही विशीं भेट जातली, अशें दामू नायक हाणी सांगलें.
प्रदेश भाजप अध्यक्ष दामू नायक हे शेनवारा रातीं दिल्ली पावले. आयज सकाळीं पक्षाचे राष्टीय सरचिटणीस बी. एल. संतोष हांचे कडेन तांची बसका जाली. २०२७ चो कृती आराखडो सादर करपा सयत वेंचणुकेची तयारी तशेंच संघटनात्मक कार्याचेर चर्चा जाली. वेंचणुके विशीं केंद्र आनी राज्य सरकारचो वावर तशेंच येवजण्यो लोकां मेरेन पावोवपा खातीर कार्यावळीचें आयोजन जातलें. मतदारसंघ, बूथ पावंड्यार बसका जातल्यो.
येत्या विधानसभा वेंचणुकेंत एसटी आरक्षण लागू करपाचे यत्न आसा. विधानसभा एसटी आरक्षण कायदो जालो आसलो तरी वेंचणूक आयोगाक आदेश दिवपी अधिसुचोवणी जारी जावपाची आसा. हाचे खातीर आतां केंद्रीय गृहमंत्री अमित शहा हांची भेट जातली. अध्यक्ष ह्या नात्यान हांव, मुख्यमंत्री डॉ. प्रमोद सावंत, आदिवासी कल्याण खात्याचे मंत्री रमेश तवडकर हे केंद्रीय गृहमंत्र्याची भेट घेतले. जे कोण दिल्ली पावतात तांकां घेवन ही भेट जातली, अशें प्रदेश भाजप अध्यक्ष दामू नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
