भांगरभूंय | प्रतिनिधी
मडगांव: दवर्ली-दिकरपाल पंचायतीच्या विशेषश ग्रामसभेंत नगर नियोजन कायद्याच्या कलम ३९-‘ए’ खाला जावपी ४३,८२८ चौरस मीटर जमनीच्या रूपांतरा आड एकमतान थाराव मंजूर केलो. हे सुवातेर दवर्लीच्या एका परंपरीक तळ्याच्या जमिनीचोय आसपाव आसा. गांवांतले हे जमनीचे सेटलमेंट वाठारांत रूपांतर केल्यार खर जनआंदोलन करतले, अशी शिटकावणी ग्रामस्थांनी ह्या वेळार दिली.
नगर नियोजन खात्यान प्रसार माध्यमां वरवीं नोटीस जारी करून ४३,८२८ चौखण मिटर जमनीचें सेटलमेंट झोनांत रुपांतरण केल्लें. पूण हे बाबतींत दवर्ली-दीकरपाल पंचायतीक पयलीं कल्पना वा कसलीच म्हायती दिवंक ना. गांवांतल्या जमनीचें रुपांतर करपाचो प्रस्न गांवकारांनी पंचायतीचे नदरेक हाडलो. ते उपरांत आयतारा खाशेली ग्रामसभा आपोवन ह्या विशयाचेर चर्चा केली. सरपंच मिनीन कुलासो हांचे अध्यक्षतेखाला ही ग्रामसभा जाली. जमनीच्या रुपांतरा संबंदीं पंचायतीक सरकारा कडल्यान कसलेंच अधिकृत पत्र वा म्हायती मेळूंक ना अशें सरपंच हांणी स्पश्ट केलें.
प्रसिद्ध जाल्ले नोटीस प्रमाण, नगर नियोजन खात्यान दवर्लीचें १०,४०० चौरस मिटर तळें आनी आशिकुशीचे जमनी सयत खोला आनी उत्तर गोंयचे कांय भाग अशी वट्ट ४३,८२८ चौरस मीटर जमीन सेटलमेंट झोनांत रूपांतरीत करपाचो प्रस्ताव दवरला.हे नोटीसीचेर हरकती नोंद करपा खातीर १४ जून ही निमाणी तारीख दिल्या.
आयतारा जाल्ले खास ग्रामसभेंत गांवातली जमीन सांबाळपाचो सामको म्हत्वाचो विशय चर्चेक आसतनाय थळावे आमदार ह्या वेळार हाजीर रावूंक ना. हाचेर थळाव्यांनी तिडक उक्तायली. हाचेर सरपंच मिनीन हांणी स्पश्टीकरण दितना सांगलें, आमदार उल्हास तुयेंकार हांणी पयलींच आपण उपलब्ध ना हें कळयिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
