भांगरभूंय | प्रतिनिधी
पणजी : पेडणें म्हालांत बिबट्याचें एक पील मेल्ले अवस्थेंत मेळिल्ल्यान राना खात्यांत आनी पर्यावरण मळार बरोच बोवाळ निर्माण जाला. हे घडणुकेची खरसाण लक्षांत घेवन राज्य सरकारान उच्चस्तरीय चवकशी करपाचे आदेश दिल्यात. शेनवारा रातीं पालयें गांवांतल्या भगतवाडो वाठारांत थळाव्या नागरिकांक हें बिबट्याचें पील मेल्ले अवस्थेंत पडिल्लें दिसलें. तांणी बेगोबेग थळाव्या प्रशासनाक आनी रान खात्याच्या अधिकार्यांक हे विशीं कळयलें. म्हायती मेळटांच पंगड बेगोबेग घडणुके सवातेर दाखल जाले आनी तांणी परिस्थितीची पळोवणी करून बिबट्याची कूड ताब्यांत घेतली.
वनविभागान दिल्ले मुळावे म्हायती प्रमाण, बिबट्याच्या पिलाक मरण नेमकें कित्याक लागून आयलें हें आजूनय स्पश्ट जावंक ना. मरणाचें मूळ कारण सोदपा खातीर ताची कूड पोस्टमार्टमा खातीर धाडल्या. वैजकी अहवाल आयले उपरांतूच हाचेर मुखार उलोवपाक मेळटलें. रानमंत्री विश्वजीत राणे हांणी आयतारा ह्या प्रकरणाची दखल घेवन, प्रधान मुख्य वनसंरक्षक कमल दत्ता हांकां खोलायेन चवकशी करपाचे निर्देश दिल्यात. ह्या वाठारांत बिबट्याक मरण सैमीक कारणाक लागून आयलां काय हाचे फाटल्यान मनशाचो हस्तक्षेप वा शिकारेचो यत्न आशिल्लो, हे नदरेन तपास यंत्रणां तपास करतात.
फाटल्या कांय काळांत रान जिवांच्या मरणाची ही पयलीच घडणूक न्हय. ह्यान पयलीं २ मेक दक्षीण गोंयांत भगवान महावीर रानजीव अभयारण्या लागसार एका वाघाची कूड कुशिल्ले अवस्थेंत सांपडिल्ली. ते घडणुके उपरांत आतां कांय दिसांनी उत्तर गोंयांत बिबट्याच्या पिलाक मरण आयिल्ल्यान राज्यांतल्या रान जिवांचे सुरक्षिततायेचो प्रस्न परत मुखार आयला. गोंयची समृद्ध जैवविविधता तिगोवन दवरपाक आनी असल्या दुर्दैवी घडणुकांची पुनरावृत्ती टाळपा खतीर रान विभागाक अदीक शिटूक रावन खर पावलां उखलचीं पडटलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
