भांगरभूंय | प्रतिनिधी
एअर कंडिशनर (एसी) कुडींतली आर्द्रता उणी करून ती थंड दवरतात. हाका लागून हवा सुकता, जाका लागून आमच्या दोळ्यांच्या पृश्ठभागाचेर आशिल्लीं दुकां खूब बेगीन उडून वतात. हाकाच लागून दोळ्यांत सुकप, जळप, चोळप, तांबडे जावप वा सेगीत अस्वस्थताय जाणवता. संगणका मुखार वा स्क्रीनी मुखार बरोच वेळ काम करपी वा चडसो वेळ घरांत घालपी लोकांक ही समस्या वाडटा. एसी पसून पयस रावप शक्य ना, मात कांय उपाय करप उपेगी थारपाक शकतात. हे विशीं डॉ. नीरज संदुजा संचालक, वियान आय अँड रेटिना सेंटर, गुरुग्राम हांणी म्हायती दिल्या.
राखणे खातीर मुखेल उपाय
तुमच्या कामाक लागून वा नेमाक लागून एसींत बसप सक्तीचें आसल्यार, मागीर हे सादे आनी प्रभावी उपाय वापरून तुमी तुमचे दोळे सुरक्षीत दवरूंक शकतात.
सरळ एसी वार्या पसून स्वताक वाटयात: तुमची बसपाची सुवात वा एसी वेंट अशे तरेन समायोजीत करात की ताची थंड आनी सुकी हवा सरळ तुमच्या तोंडार वा दोळ्यांचेर पडची ना.
स्क्रिन पसून नेमान ब्रेक घेवचो: काम करतना दोळे सेगीत स्क्रिनीचेर लावन दवरचे न्हय. मात्सो ब्रेक घेवचो आनी स्क्रिनी कडल्यान हेर कडेन पळोवचें.
सेगीत दोळ्यांच्यो पापण्यो धांपून उगडात: आमी चड करून स्क्रिनीचेर पळयतना पापण्यो बंद करपाक विसरतात. जागूत रावन सेगीत पापण्यो धांपून उगडात, जाका लागून दोळ्यांत सैमीक ओलसाण तिगोवन दवरपाक मदत जातली.
फावो तें उदक पियेवन हायड्रेटेड रावचें: कुडींतली ओलसाणीची पातळी तिगोवन दवरपा खातीर दीसभर फावो तें उदक पियेवचें.
दोळ्यांचे लुब्रिगेटींग आय ड्रोप्स: दोळ्यांचें सुकप तुमकां खूब त्रास दिता जाल्यार दोतोराच्या सल्ल्या प्रमाण दोळ्यांत ओलसाण दवरपी लुब्रिगेटींग ड्रोप्स घालचे जे तुमकां खूब फायदेशीर थारूंक शकतात.
खाशेली टीप: सगली जतनाय घेतली तरी दोळे सुके आनी अस्वस्थताय चड काळ तिगून उरल्यार ताचे कडेन आडनदर करची न्हय. योग्य तपासणी, अचूक कारण आनी योग्य उपचारा खातीर दोळ्यांच्या दोतोराचो सल्लो घेवचो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
