भांगरभूंय | प्रतिनिधी
पणजी :गोंय वैजकी महाविद्यालयाच्या (गोमेकॉ) प्रतिबंधात्मक आनी समाजीक वखदांवैद्यक विभागांतले सहाय्यक प्राध्यापक डॉ. अमित डायस हांकां ‘२०२५ सायरँक ग्लोबल रजिस्ट्री’त संवसारांतल्या पयल्या ५ टक्के शास्त्रज्ञां मदीं सुवात मेळ्ळ्या. विज्ञानीक उत्पादकता आनी संशोधनाच्या प्रभावाच्या स्वतंत्र संवसारीक विश्लेशणांतल्यान ह्या प्रतिश्ठीत वळेरेंत संवसारीक क्रमवारी १,६१,२०९ चेर निवड केल्या.
संवसारीक संशोधन मळावेलो मानाचा भोवमान सायरँक ग्लोबल २०२५ सायंटिस्ट इंडेक्स हो संवसारांतलो सुमार १ कोटी सक्रीय संशोधक आनी ५ कोटीं परस चड शिक्षणीक संशोधन प्रकाशनांच्या सर्वसमावेशक मुल्यांकनाचेर आदारून आसा. हे संवसारीक वळेरेंत डॉ. अमित डायस हांचो जाल्लो आसपाव तांच्या वयक्तीक जिणेंतलो भोवमान, तशेंच गोंय वैजकी महाविद्यालय आनी गोंयच्या संवसारीक भलायकी संशोधनांतल्या वाडपी योगदानाचीय नोंद घेवपी आसा.
डॉ. डायस हांणी लंडन स्कूल ऑफ हायजीन अँड ट्रॉपिकल मेडिसीन आनी युनिव्हर्सिटी कॉलेज लंडन हांगच्या एमडी (प्रतिबंधात्मक आनी सामाजीक वखदां वैद्यक), ट्रॉपिकल मेडिसीन अँड हायजीन पद्विका, जेरियाट्रिक मेडिसिनमधील पदव्युत्तर पदविका तशेंच क्लिनिकल ट्रायल्सांत एमएससी अशीं उच्च शिक्षण पुराय केल्यांत.
डिमेंशिया आनी भौशीक भलायकी संशोधनांतलें योगदान
डिमेंशिया (स्मृतिभ्रंश), निरोगी वृद्धत्व, मानसीक भलायकी, गोडेंमूत आनी हेर म्हत्त्वाच्या भौशीक भलायकी विशयांवेल्या संशोधना खातीर डॉ. अमित डायस हांकां आंतरराष्ट्रीय पांवड्यार वळख मेळ्ळ्या. तांच्या संशोधनाचो उपेग भलायकी धोरणां आनी वैजकी मळावेल्या अभ्यासां खातीर म्हत्वाचो मानतात.
गोंयच्या लोकांची सेवा करपाची संद दिल्ले खातीर राज्य सरकार आनी भलायकी मंत्री विश्वजीत राणे हांचो आपूण उपकारी आशिल्ल्याचें डॉ. डायस हांणी सांगलें. तशेंच गोमेकॉ प्रशासन, आदले डीन डॉ. सी. पी. दास, डॉ. व्ही. एन. जिंदाल आनी आदले शिक्षक प्राध्यापक डी. डी. मोटघरे हांच्या फाटबळा विशीं तांणी कृतज्ञता उक्तायली. बायल डॉ. लिडिया हांणी दिल्ल्या तेंक्या बगर हो प्रवास शक्य जावचो नाशिल्लो अशेंय तांणी नमूद केलें.
हें येस फकत म्हजें न्हय, गोमेकॉ, म्हजे सहकारी, शिक्षक, कुटुंबीय आनी गोंयच्या भलायकी मळाचें आसा. संशोधनाच्या माध्यमांतल्यान समाजा खातीर योगदान दीत रावप हीच फुडली वाटचाल आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
