भांगरभूंय | प्रतिनिधी
शिक्षणीक मळार नैतीक शिक्षण भोवच गरजेचें आनी म्हत्वाचें. कित्याक ? बऱ्या आनी वायटा मदीं अंतर करूंक आनी बरें तें वेंचून काडूंक तें आदाराचें जाता. नैतीक शिक्षण ल्हान वंयाचेर भुरग्यांच्या काळजा-मनांत किल्लोवन हाडूंक प्राथमीक पावल जावंक गरज, कित्याक? नैतीक शिक्षण तांचो सभाव आकारता. कशे तरेन वागचें तें शिकयता. खाजगी फायद्याचे निर्णय घेवंक आदाराचें जाता. आनी दुसऱ्यांक वायट करपाचें पयसायता. नैतीक तत्वां जावं , सत्य उलोवप, दुसऱ्यांक मान दिवप आनी समजून घेवप तशेंच खऱ्या मनीसपणान जियेवंक आधाराचें जाता. नैतीक शिक्षणा वरवीं मनीस आपलें जिवीत अर्थभरीत जियेवंक पावता. आनी समाजांत बरेंपण शिंपडावपी व्यक्ती उरता.
सगळ्या मळा वयलें शिक्षण घेतना नैतीक शिक्षणाचें भांडार कोणाच्यानच नाकारूंक जायना. असलें शिक्षण नाकारतलो जिविताचो खरो ठेवो सोदून दिता. आनी अखेरेक आपणाकूच फटयता. नैतीक शिक्षण घेनासतान दुसरें शिक्षण घेवपी आपल्या जिविताचो हेतू पूर्ण करूंक पावचो ना. नैतीक शिक्षणा वरवीं मनीसपण कितें तें मनीस शिकता. ह्या शिक्षणा वरवीं मनीस जिवितांत जबाबदारी पाळूंक, दुसऱ्याच्या हुसक्यान वाडूंक, दुसऱ्यांक मानान लेखूंक, आपणाचें आनी दुसऱ्याचें वर्तेपण वळखून घेवंक जिविता सवें भरवंशाची नदर दवरूं, अदीक शिकपाचें मन घेवन फुडें वचूंक आनी समाजांत बरो नैतीक मनीस जावंक पावता.
मनशाचें जिवीत फकत ताच्या शिक्षणाचेर न्हय बगर ताच्या सबावाचेर धरिल्लें आसता. वर्तमान पत्रांचेर नदर भोंवड्यायल्यार सकारात्मक बरोवप उणें दिसता. नकारात्मक बरोवप भोवच चड. जेन्ना नैतीक शिक्षणाची आकारणी आमच्या जिविताचो भाग जायना तेन्ना नकारात्मक विचार आमच्या मनांत अदीक छापून उरतात. आनी मचें धरोण आनी वागप नकारात्मकूच जाता. नैतीक शिक्षण दुसऱ्यांक दितना उतरांनी तें शिकोवंक जायना, पूण वागणुकेंतल्यान दिवंक गरज. तेच पासत दर एका वडिलान, ल्हानांक आनी व्हडल्यांक नमुने आनी वागणुकेंतल्यान मार्गदर्शक जावंक फावो. दुसरीं भुरगीं आयकून आनी वाचून शिकचे परस पळोवन आनी अणभवून अदीक शिकतात.
दरेक शिक्षकान भुरग्यांक वेग-वेगळें शिक्षण शिकतयतान नैतीक शिक्षणाचेंर थोडें भोव लक्ष घालप तांची नैतीक जबाबदारी. भुरग्यांक फुडारांचे खांबे कशे आकारून हाडटना तांची नैतीक वाड भोवच म्हत्वाची. नैतीक शिक्षणांचो प्रभाव न्हयच मनशांकुळांचेर पूण श्रृश्टीचेर आनी समजाचेरूय पडटा. स्वयम सेवक जावन समाजांत नातीक बियां शिंपडावपी भोव थोडे पूण वेगळोचार निर्माण करपी. वाट शिंपडावपी, दुस्पट वाडोवपी आनी अनीत शिंपडावपी भोवच चड. आयच्या धांवत्या समाजांत आनी वाडट्या विज्ञानाक लागून नैतीक शिक्षणांचेर भोर घालपाची मनशाकूळ राखून दवरूंक पावतात. वरतीं तत्वां मुल्ल्यां ल्हानूच थावन किर्लावन हाडूंक दर एकल्यान पावल मारूंक फावो.
दरेका मनशाचें संस्कृतीक, अर्थीक , धर्मीक, अर्त्मीक आनी समाजीक जिवीत बरें जातलें जाल्यार नैतीकपण दर एका मनशांत आसप गरजेचें. जण एकल्यान दुसऱ्या सवें उतरांनी दया दाखयल्यार पुरो ना पूण दुसऱ्यांच्या कश्टतां, दुखांत आनी प्रस्नांत वांटेकार जावन कर्ण्यांतल्यान दाखोवंक प्रयत्न करूंक जाय. दरेका मनशाचें मन बरें जाल्यार मनशाचो सभाव बरो. मनशाच्या चिंतपांत मनशाची वागणूक आकारान येता. नैतीकपण आमचें जिवीत नीट आनी दिशेन फुडें व्हरता. आनी आमकां भासयल्या थिकणार पावता.
प्रामाणीकपणाचें जिवीत सगळ्यांक आवडटा पूण स्वता कोणूच आपूण सतान जियेवंक सोदीना. दुसऱ्यांनी तुजे सवें केल्लें तुका जाय तेंच तूं दुसऱ्या सवें कर, हो भांगरांचो उपदेस आमकां बरें तें आपणावंक आनी बरें तें करूंक हुस्केता. मनशाच्या जिवितांक नैतीकपण बळजबरेन घालूंक जायना पूण तें जण एकल्यान आप खोशयेन स्विकारूंक जाय. आपलें जिवीत फुडाराचे दिशेन फुडें वर्ततनां नैतीक शिक्षणाची बडी एका हातांत दवरून मनशान फुडें पावल मारल्यार मनीस आपलें जिवीत बऱ्याक पावयतालो. आनी जिविताचो खरो खरो अर्थ समजूक आनी जियेवंक पावतलो. मनीस आपल्या वाद्याचो (इन्ट्रैक्टबल) जाता आनी आपल्याच मना प्रमाणें फुडें वता तो निसंतानांचो शेवट निर्माण करता. बऱ्या सभावाचो मनीस मनशा कुळाक आनी समाजाक एक देणें जाल्यार वायट सभावाचो मनीस एक काणतालो (डिस्गस्ट). दरेका मनशान आपलें जिवीत कशें आकारून हाडचें आनी जिवितांक कितें आपणावचें तें दर एका मनशांचेर अवंलबून आसा.
फादर मायरन जेसन बार्रैटो
9923539749
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
