भांगरभूंय | प्रतिनिधी
शिरगांवः शिरगांवां कुटुंबिक वादांतल्यान एके बायलेक फारान मारपाचो यत्न केल्याची धक्को दिवपी घडणूक मध्यान रातीं घडली. पिस्तुलांतल्यान सुटिल्ली गुळी दारांतल्यान सरळ सोफांत घुसली. हाका लागून व्हड दुर्घटना टळ्ळी. ह्या प्रकरणांत दिवचल पुलिसांनी दुबावीत प्रज्योत गांवकार आनी गिरीश गांवकार ह्या तांच्या दोगा पुतणयांक अटक केल्या.
मेळिल्ले म्हायती प्रमाण, महाराष्ट्राचे उपमुख्यमंत्री एकनाथ शिंदे हांच्या शिवसेनेचे गोंयचे मुखेली आनी भंडारी समाजाच्या दुसऱ्या गटाचे फुडारी उपेंद्र गांवकार हांकां पयलीं तांच्या पुतणयांनी फोन करुन गाळी संवल्यो. उपरांत दुबावितांनी तांचे घरा वचून घराचेर हल्लो केलो.
ह्या वेळार उपेंद्र गांवकार घरा नाशिल्ले. पूण घरांत आशिल्ले तांचे घरकान्नीन हल्लेखोरांक पळयले आनी फाटल्या दारांतल्यान भायर सरुन आपलो जीव वाटायलो. उपरांत दुबावितांनी घराचें दार फोडून भितर सरले. ह्या वेळार फारफेट केली आनी पिस्तुलांतल्यान सुटिल्ली गुळी दारांतल्यान वचून सरळ सोफांत घुसली. हाका लागून संबंदीत बायल वाटावली.
घरांत कोणूच मेळूंक नाशिल्ल्यान दुबावितांनी घरांत तोडफोड केल्ल्याचेंय सांगतात. ते उपरांत हातांत पिस्तुल घेवन गांवांतल्या वेगवेगळ्या सुवातींनी उपेंद्र गांवकार आनी तांचे घरकान्नीचो सोद घेतात, अशी म्हायती मेळ्ळ्या. उपेंद्र गांवकार घरा येतना तांकां हे घडणुकेची खबर कळ्ळी आनी ते रोखडेच थंयच्यान फाटीं सरले आनी घरा येनासतना परत गेले.
प्रत्यक्षदर्शींच्या म्हणण्या प्रमाण, ही सगळी घडणूक खूब भिरांकूळ आशिल्ली. हाका लागून शिरगांव वाठारांत भंय आनी तणावाचें वातावरण निर्माण जालें.
प्राथमीक म्हायती प्रमाण, ही घडणूक कुटुंबीक वादाक लागून घडिल्ल्याचो पुलिसांक दुबाव आसा. दोगूय दुबावीत उपेंद्र गांवकार हांचे पुतणये आसात आनी तांणी काकीक लक्ष्य करून फारफेट केल्ल्याचें कळटा. दिवचल पुलिसांनी बेगोबेग कारवाय करून दोगूय दुबावितांक अटक केल्या आनी फुडली चवकशी चलता. दोगांतलो एकलो हल्लेखोर सरकारी कर्मचारी आसा आनी वीज खात्यात काम करता. ताची घरकान्न पुलिशेंत आसा, अशेंय कळटा.
हे घडणुकेक लागून शिरगांव वाठारांत व्हड बोवाळ आनी भंय निर्माण जाला. दिसाउजवाडा पिस्तुल वापराक लागून कायदो आनी सुवेवस्था विशीं हुस्को उक्तायतात.
Maharashtra #EknathShinde #ShivSena #Goa #UpendraGaonkar #Firingathouse #firing #crime #shirgao #bicholimtaluka #bicholimpolice
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
