वेंचणुकेंत जावपी हिंसा अयोग्य

भांगरभूंय | प्रतिनिधी

अस्तंत बंगालांत उसळिल्ल्या ह्या राजकी हिंसाचाराचें समर्थन कोणूच करचो ना. हिंसा ही निशेध करपा सारकी गजाल.

वेंचणुको आनी हिंसा हे आमचे लोकशायेक नवें न्हय. वेंचणुकेंत हिंसाचार जाताच. मागीर ती ग्रामपंचायतीची वेंचणूक आसूं वा विधानसभेची, लोकसभेची. हिंसाचार जाले बगर वेंचणुको जाल्यो अशें जायच ना असो आमचो एक अणभव आसा. चड करून उत्तर भारतीय हिंदी भाशीक वाठारांतल्या राज्यांनी तर वेंचणुको आनी हिंसाचार हें एकाच नाण्याच्यो दोन बाजू थारल्यात. त्या मानान गोंय हें वेंचणुकेचे बाबतींत देशांतलें एक बरें आनी आदर्श राज्य. हांगा तशी परिस्थिती ना. गोंयांतल्या वेंचणुकांनी हिंसाचार जायच ना म्हणल्यार लेगीत चलता. सगल्यो वेंचणुको म्हणल्यार पंचायत, जिल्हो पंचायत, विधानसभा, लोकसभा ह्यो वेंचणुको शांततायेन जातात. सगलेच लोक सुशिक्षीत आशिल्ल्यान हिंसाचाराचो प्रस्नूच उप्रासना. पूण हेर राज्यांनी वेंचणुके आदीं वा वेंचणुके उपरांत व्हड प्रमाणांत हिंसाचार जातात.
आतां अस्तंत बंगालचेंच पळयात. ह्या राज्यांत विधानसभा वेंचणुकेचो निकाल जाहीर जातकच राजकी पक्षांतल्या कार्यकर्त्यां मदीं मारपेटीच्यो घडणुको घडल्यो. इतलेंच न्हय जालयार तोडफोड, आनी लासून उडोवपाच्यो घडणुकोय घडल्यो. ह्या हिंसाचारांत कार्यकर्त्यांची हत्याय जाली. शेंकड्यांनी कार्यकर्ते जखमी जाले. अस्तंत बंगालचे मुख्यमंत्री सुवेंदु अधिकारी हांचे पीए चंद्रनाथ रथ हांची फार पेटोवन हत्या केली. पुलिसांनी हिंसाचार प्रकरणांत 400 कार्यकर्त्यांक अटक केली. थंयचीय परिस्थिती आयज लेगीत तणावाचीच आसा. तृणमूल काँग्रेसीचे फुडारी अभिषेक बॅनर्जी हाका लोकांनी मारपेट करून तांतयां, टमाटां मारलीं. तृणमूलच्या एका खासदाराक लेगीत मारबडय करून जखमी केलो. हो हिंसाचार थांबोवपा खातीर पुलीस दळ सगले तरेचे यत्न करीत आसात. पूण परिस्थिती नियंत्रणा भायर वचत आसा. अर्थांत अस्तंत बंगालाक वेंचणुकेंतलो हिंसाचार नवो न्हय.
फाटले विधानसभा वेंचणुकेचे पयलींय थंय असोच हिंसाचार जाल्लो. तेन्ना जाल्ल्या हिंसाचारांत जाल्यार 35 जाणांची हत्या जाल्ली. इतलेंच न्हय जाल्यार त्या वेळार हिंसाचार, बॉमस्फोट लेगीत जाल्लो. आतांय लागीं लागीं तशीच परिस्थिती बंगालांत आसा. हो हिंसाचार भाजपाचे फुडारी आनी कार्यकर्ते घडोवन हाडटात असो आरोप तृणमूल काँग्रेसीन केला. जाल्यार ममता बॅनर्जीच्या आदेशान तृणमूल काँग्रेसीचे कार्यकर्ते अस्तंत बंगालांत हिंसाचार घडोवन हाडटात असो आरोप भाजपा वतीन करतात. हे दोनूय पक्ष हिंसाचार प्रतिस्पर्धी पक्षान घडोवन हाडला असो आरोप करीत आसले तरी हिंसाचारांत दोनूय वटानचे कार्यकर्ते वांटेकार आशिल्ल्यान ह्या हिंसाचाराक भाजप आनी तृणमूल हे दोनूय पक्ष तितलेच जापसालदार आसात असो आरोप थळावे नागरीक करीत आसात.
अस्तंत बंगालांत उसळिल्ल्या ह्या राजकी हिंसाचाराचें समर्थन कोणूच करचो ना. हिंसा ही निशेध करपा सारकी गजाल. लोकशायेंत हिंसेक थारो ना. अस्तंत बंगालांत ह्या हिंसाचारांत चार कार्यकर्त्यांचो बळी गेलो ही हुस्को करपी गजाल आसा. भारतीय लोकशाये खातीर ही भिरांकूळ अशीच गजाल आसा. भारतीय लोकशाये खातीर हें शुभचिन्न न्हय वास्तवीक लोकशायेंत हिंसेक थारो ना. पूण सद्या जें घडत आसा ताणें लोकशायेचे बारा बिरेस्तार तेरा शुक्रार करून उडयल्यात. वेंचणुकेंत जावपी हिंसा उणी करपा खातीर वेंचणूक आयोगान ठोस धोरण आखूंक जाय. हिंसाचाराक जापसालदार आशिल्ल्या राजकी फुडाऱ्यांचेर आनी पक्षांचेर बंदी हाडून तांचेर कायदेशीर कारवाय करूंक जाय. वेंचणूक आयोगान हिंसामुक्त वेंचणुके खातीर खर पावलां उबारूंक जाय.

श्याम ठाणेदार
9922546295