भांगरभूंय | प्रतिनिधी
म्हापशें पुलिसांनी दाखल केल्लो गुन्यांव
बदनामीच्या भंयान उखल्लें चुकीचें पावल
कूड घेवपाक सॅम्युअलाच्या कुटुंबीयांचो न्हयकार
भांगरभूंय | प्रतिनिधी
पणजी : भौशीक सुवातेर कोयर उडयतनाचो व्हिडियो सोशल मिडियाचेर व्हायरल जालो. उपरांत ह्या प्रकरणांत म्हापशें पुलिसांनी ताचेर गुन्यांव दाखल केलो. ह्या ताणांतल्यान एका महाविद्यालयीन विद्यार्थ्यान स्वताचेर पिस्तुलाची गोळी घालून आत्महत्या केल्ल्याची दुर्दैवी घडणूक घडली. म्हापशेंच्या गांवसावाडो वाठारांत घडिल्ले हे घडणुकेंत सॅम्युयल गार्विन दा ब्रागांझा (23) हो तरणाटो सोंपलो. डिजिटल मळार ट्रोलींग, समाजीक प्रतिश्ठा आनी अचकीत आयिल्ले कायदेशीर प्रक्रियेचो तरणाट्याच्या मनाचेर कशे तरेन वायट परिणाम जावपाक शकता, हें हे घडणुकेंतल्यान मुखार आयलां आनी ही गजाल सामकी हुस्को करपा सारपा सारकी आसा. मजगतीं, आत्महत्या केल्ल्या सॅम्युअलाची कूड घेवपाक ब्रागांझा कुटुंबियान न्हयकार दिला. व्हिडियो व्हायरल करपी व्यक्तीक अटक करपाची तशेंच गुन्यांव नोंद करपी पुलीस निरिक्षक आनी उपनिरिक्षकाचेर कारवाय करपाची तांणी मागणी केल्या.
आत्महत्येची घडणूक बिरेस्तारा रातच्या सुमार 12.40 वरांचेर घडली. सॅम्युयलान घरांतल्या बाथरुमांत वचून स्वताचेरूच गुळी मारली. रातचो अचकीत फाराचो व्हड आवाज आयिल्ल्यान ताच्या घरच्यांनी धांव घेतली तेन्ना आत्महत्येचो प्रकार उक्तडार आयलो. सॅम्युअल बाथरुमांत रक्तांत पडिल्लो. कुटुंबीयांनी ताका बेगोबेग म्हापशें हॉस्पिटलांत दाखल केलो. मात उपचारां पयलींच दोतोरांनी ताका मरण आयिल्ल्याचें सांगलें. म्हापशें पुलिसांनी घडणुके सुवातेर वचून पंचनामो केलो. ताची कूड सध्या पोस्टमार्टमा खातीर गोमेकाँत धाडल्या.
सॅम्युयलाचो रस्त्या कुशीक कोयर उडयतनाचो व्हिडियो बुधवारा 3 जुनाक एका मनशान काडिल्लो. हो व्हिडियो बिरेस्तार सोशल मिडियाचेर व्हडा प्रमाणांत व्हायरल जालो. व्हायरल व्हिडियोची दखल घेवन म्हापशें पुलिसांनी भौशीक भलायकेक धोको निर्माण केल्ल्याच्या आरोपा खाला सॅम्युयला आड भारतीय न्याय संहितेच्या कलम 271 आनी गोवा नॉन- बायोडिग्रेडेबल गार्बेज (कंट्रोल) कायद्या खाला गुन्यांव दाखल केल्लो. तशेंच बिरेस्तारा ताका पुलीस स्टेशनांत आपोवन कायदेशीर नोटीस दिल्ली. हे अचकीत घडिल्ले घडामोडींक लागून आनी समाजीक बदनामीच्या भंयान सॅम्युयलान हें सामकें खर आनी चुकीचें पावल उखलिल्ल्याचें समजता. पुलीस फुडलो तपास करतात.
मजगतीं, म्हापशें शारांत घडिल्ली घडणूक ही दुर्दैवीच आसा. नगरपालिका वाठार नितळ आनी कोयरमुक्त आसचो, ते खातीर पालिका सगळे तरेचे यत्न करता. उक्तडार कोयर उडोवप हें चुकीचेंच आसा, ताचें समर्थन कोणूच करचो ना. मात म्हापश्यां गाडयांच्यो गाडयो भरून कोयर हाडून उडयतात. अश्या लोकांचेर खर कारवाय जायना. मात कार्डबोर्डा सारकी वस्तू उडोवपी तरणाट्याक समज दिनासतना ताचेर गुन्यांव दाखल करून ताच्या वांगडाच कुटुंबाक मानसीक त्रास दिवपाचोय प्रकार लेगीत गुन्यांवकारी प्रवृत्तीचो आसा, अशें आदले उपनगराध्यक्ष प्रकाश भिवशेट हांणी सांगलें.
थळावो समीर हरमलकार हाणें प्रतिक्रिया दितना सांगलें, खूब खेपे म्हापशें पालिके कडल्यान उक्तडार कोयर उडोवप्याक धरून दंड दितात, मात तरी लेगीत कोयर उडोवपाचे प्रकार बंद जावंक नात. म्हापशें शारा लागसारच्या पंचायतींनी कोयर वेवस्थापनाची योग्य तरेन येवजण चालीक लायल्यार म्हापशेंची ही कोयराची समस्या उण्यांत उणी 80 टक्के तरी सुदारतली. तशेंच म्हापशें पालिकेन घराघरांतलो कोयर एकठांय करपाचे येवजणेंत आनीक सुदारणा करून कामगारां कडल्यान वेवस्थीत कोयर संकलन करपाचें भर दिवपाक जाय.
कार्डबोर्डाचो कोयर व्हरनाशिल्ल्यान ‘ट्रोल’
सॅम्युअल हो पेशान शिक्षिका आशिल्ली आवय आनी दोन भयणीं वांगडा रावतालो. 10 वर्सां आदीं ताचो बापूय भायर पडिल्लो. ताका लागून कुटुंबाक सॅम्युअलाचोच आदार आशिल्लो. सामको शांत आनी म्होवाळ उलोवपी सॅम्युएल सद्दां जिमांत वतालो. थंयच तो पार्ट टायम ट्रेनर म्हूण काम करतालो. घरांत वीज दुरुस्तीचें काम चलतालें. ह्या कामा वेळार कार्डबोर्डाचो कोयर जाल्लो. पालिकेचे कोयर एकठांय करपी कामगार हो कोयर घेनाशिल्ले. तेच खातीर 3 जूनाक सांजे वेळार सॅम्युअलान हो कोयर गांवसावाड्यार रस्त्या कुशीक उडयलो. त्याच वेळार थंयच्यान एक प्राणीमित्र वतालो, ताणें सॅम्युअलाक जाब विचारलो आनी व्हिडियो काडून सोशल मिडियाचेर व्हायरल केलो. ते उपरांत सॅम्युअलाक ट्रोलाक फुडो करचो पडलो. वाऱ्या वरी व्हायरल जाल्ल्या व्हिडियोक लागून सॅम्युअल मानसीक नदरेन खचिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
