भांगरभूंय | प्रतिनिधी
पणजी : शुक्रारा 5 जूनाक मॉन्सून गोंयांतल्या कांय वाठारांनी पाविल्ल्याचें हवामान खात्यान जाहीर केलें. फुडल्या दोन ते तीन दिसांत मॉन्सून पिराय गोंयांत पातळपाची शक्यताय हवामान खात्यान उक्तायल्या.
अंदूं मॉन्सून केरळांत तीन दीस उसरां म्हणल्यार 4 जूनाक पाविल्लो. अनुकूल वातावरणाक लागून मॉन्सून केरळ सावन फक्त एका दिसांत गोंयांतल्या कांय वाठारांनी पावलो. हाका लागून मॉन्सून गोयांत वेळार पावला. पोरूं लेगीत मॉन्सूनचो केरळ ते गोंय हो प्रवास एका दिसांतूच जाल्लो.
गोंयांत 5 ते 9 जून ह्या काळांत वादळी वाऱ्या सयत पावसाची शक्यताय आसा. ते प्रमाण हवामान खात्यान ह्या दिसां खातीर पावसाचो यलो अलर्ट जारी केला. गोंयांत 24 वरांत सरासरी 10.3 मिलिमीटर पावसाची नोंद जाली. हे मजगतीं, काणकोणां 60 मिमि जाल्यार मडगांवां 21 मिमि पावसाची नोंद जाली. 1 ते 5 जून ह्या काळांत गोंयांत सरासरी 27.3 मिमि पावसाची नोंद जाली.
शुक्रारा पणजे चडांत चड 31.6 अंश जाल्यार उण्यांत उणें 25.2 अंश सेल्सियस तापमानाची नोंद जाली. मुरगांवां चडांत चड तापमान 32.2 अंश आनी उण्यांत उणें तापमान 25.6 अंश सेल्सियस आशिल्लें.
पुडले स दीस गोंयांतलें चडांत चड तापमान 33 ते 34 अंश जाल्यार उण्यांत उणें तापमान 25 ते 26 अंश सेल्सियस आसपाची शक्यताय आसा. अंदूं मॉन्सून सरासरी परस उणो आसपाची शक्यताय आसा. प्रशांत म्हासागरांत अल निनो वातावरणीय प्रणाली निर्माण जावपाची शक्यताय आसा. ताका लागून मान्सूनाचें प्रमाण सरासरीच्या 90 टक्क्या मेरेन आसपाची शक्यताय आसा. पोरूं मॉन्सून केरळांत 8 दीस आदींच म्हणल्यार 24 मेक पाविल्लो, जाल्यार 25 मेक तो गोंयांत पाविल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
