भांगरभूंय | प्रतिनिधी
नायजर : अस्तंत आफ्रिकेंतल्यान एक भयानक घडणूक मुखार आयल्या. सहारा रेंवटांत (वाळवंट) प्रवाशांनी भरिल्लो ट्रक अचकीत मोडलो. चड उश्णताय आनी उदकाच्या उणावाक लागून ट्रकांतल्या ४९ जाणांक मरण आयलें. एके कार्यावळींत वांटो घेवन ते सगळे माली देशांतल्यान परतताले.
डेजर्ट देथ: नेमकें कितें जालें?
हे घडणुके संबंदी नायजरांतल्या अगाडेज गव्हर्नरांनी अधिकृत निवेदन जारी केलां. ह्या निवेदना प्रमाण हे सगळे प्रवासी अस्सामाका सावन सुमार ८० किलोमीटर भितर आडकून पडले. अस्सामाका हो नायजर आनी आल्जेरिया हांचे मदलो एक क्रॉसिंग पॉयंट आसून तो मालीचे शिमेलागीं आसा.
ट्रक दुरुस्त करपाचो पुराय यत्न केलो पूण…
चलतना ट्रक अचकीत मोडून पडलो. ड्रायव्हर, ताचो मदतगार आनी प्रवाशांनी ट्रक दुरुस्त करपाचो पुराय यत्न केलो, पूण तांकां यश मेळ्ळें ना. मजगतीं, गाडयेंतलें पिवपाचें उदक सोंपलें. गरम रेंव, खर उश्णताय आनी जेवण- उदक नाशिल्ल्या धोक्याच्या वाठारांत सगले आडकून पडले. निमाणें चड तान आनी उश्णतायेक लागून सगळ्यांक थंयच मरण आयलें. प्रशासनान दिल्ले म्हायती प्रमाण मरण आयिल्ल्या सगळ्या दुर्दैवी प्रवाशांक सामुहीक दफनभूंयेंत पुरले.
दोग जाण वाटवले
हे काळजाक पीळ घालपी घडणुकेंतल्यान दोन प्रवासी वाटवल्यात. मेल्यार मेले म्हूण ते खर वतांत ५० किलोमिटरां परस चड चलून गेले. रेंवटांतल्यान वाट काडटना निमाणे ते उदकाच्या स्रोता लागीं पावले आनी थंयच्यान असमकाक वचपाचो रस्तो घेतलो. ह्या दोग प्रवाशांनी ट्रक मोडून पडला आनी थंय लोक आडकून पडल्यात अशी म्हायती प्रशासनाक दिली. पूण तो मेरेन त्या ४९ जाणांक मरण आयिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
