भांगरभूंय | प्रतिनिधी
आनीक सोंसू नेजो चळवळीच्या शिश्टमंडळाची राज्यपालांकडे मागणी
पणजीः सरकारान बेगीनचे बेगीन विधानसभा अधिवेशन आपोवचें आनी न्या. फेर्दीन रिबेलो हांणी मांडिल्ल्या विधेयकांचेर चर्चा घडोवन हाडची अशे निर्देश राज्यपालान दिवचे, अशी मागणी करपी निवेदन आनीक सोसूं नेजो चळवळीच्या शिश्टमंडळान राज्यपाल पुसापती गजपती अशोक राजू हांचे कडेन केल्या. राज्यपालांनी आमच्या मागण्यांक सहमती दाखयल्या आनी ह्या विशयांत लक्ष घालपाचें आस्वासन दिलां, अशें पर्यावरण वावुरपी नोर्मा आल्वारेस हांणी सांगलें.
पर्यावरण दिसा निमतान आनीक सोसूं नेजो चळवळीच्या एक शिश्टमंडळान राज्यपालांची भेट घेवन तांकां निवेदन भेटयलें. ह्या वेळार चळवळीचे वांगडी एल्विस गोम्स, गोविंद शिरोडाकर आनी देविदास आमोणकार हजर आशिल्ले.
गोंयची शेत जमीन, कुळाची जमीन राखून दवरपा विशीं आमची पुराय चळवळ आसा आनी जे भशेन दोंगर कापून शेतां भरपाच्यो गजाली चल्ल्यात तांकां लागून आमी दुखी आसात, अशें आल्वारेस हांणी सांगलें.
आमी राज्यपालांक १० मागण्यांचे चार्टर सादर केलें. तांणी ह्यो मागण्यो वाचून पर्यावरणा खातीर आपली सहानुभूती दाखयल्या. दर सरकार आनी लोकांचें सहकार्यान पर्यावरणाचें संवर्धन जायना जाल्यार येवपी वर्सांत आमकां कांयच उरचें ना. पर्यावरणाच्या विशयाचेर तांकां चिंता आसा आनी जे विशय आमी मांडल्यात ते तांणी मान्य केल्यात, अशें आल्वारीस हांणी म्हणलें.
फाटल्या विधानसभा अधिवेशनांत आमी विरोधी पक्षा कडेन दिल्लीं विधेयकां विधानसभा आपोवन ताचेर चर्चा करपाची सुचोवणी सरकाराक दिवची अशें आमी राज्यपालांकडेन मागलां. फाटलें अधिवेशन १० दिसां पुरतें मर्यादीत दवरून ह्या विधेयकांचेर चर्चा जावंक ना. देखून ह्या विधयेकाचेर चर्चा करून सरकारान ती मान्य करून घेवपाक जाय हे विशीं आमी राज्यपालांक समजावन सांगलां, अशी म्हायती आल्वारेस हांणी दिली.
तशेंच आमी कॅसीनोचो विशय मांडून सांगलें, मांडवींत आशिल्ल्या कॅसीनोंक लागून प्रदुशण जालां आनी कॅसीनो आसप ही आमची संस्कृती न्हय. ह्या विशयाचेर राज्यपालान आमकां तेंको दिवन सांगलें, जे सुवातेर कॅसीनो आसात ते प्रत्यक्षात थंयसर आसपाक जायना. ह्या विशयांत लक्ष घालून तांणी चर्चा करपाचे आस्वासन दिल्ल्याचे आल्वारेस हांणी सांगलें.
जो मेरेन विधानसभा अधिवेशन घेवपाची कळोवणी राज्यपालांक दिनात तो मेरेन राज्यपाल अधिवेशन आपोवपाक शकना हो कायदो आसा. मात राज्यपालांनी आपलो नैतीक प्रभाव सरकाराचेर घालचो. सरकाराक प्रभावीत करपा खातीर आपलो नैतीक अधिकाराचो वापर करचो अशी मागणी आमी केल्या आनी राज्यपाल मान्य जाल्यात, अशें एल्विस गोम्स हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
