भांगरभूंय | प्रतिनिधी
पणजीः सरकार गोंयचे १८ हजार हॅक्टर जमीन परतून जिवी करतलें. हे खातीर ह्या मळार तज्ञां कडेन कबलात जाल्या अशें मुख्यमंत्री डॉ.प्रमोद सावंत हांणी सांगलें.
संवसारीक पर्यावरण दिसा निमतान शुक्रारा पणजे आयोजीत केल्ले कार्यावळींत ते उलयताले. ह्या वेळार खासदार सदानंद शेट तानावडे, मंत्री बाबुश मोन्सेरात, आमदार राजेश फळदेसाय, रुडॉल्फ फर्नांडीस, केदार नायक, महापौर रोहित मोन्सेरात, मुख्य सचिव व्ही कांदावेलू, प्रदूशण नियंत्रण मंडळाचे लेविन्सन मार्टिन्स , हरीश हडकोणकार आनी हेर अधिकारी हाजीर आशिल्ले.
राज्यांतलें पर्यावरण सांबाळपा खातीर सरकार वेगवेगळे उपक्रम चालीक लायता. शेतकी आनी हेर खात्याच्या आदारान राज्यांतल्या सुमार ३७ हजार हॅक्टर पडींग जमीन परत लागवडीखाला हाडटले. आतां आमी खाजन शेती खातीरय यत्न करतले. ते खातीर १८ हजार हॅक्टर खाजन जमीन परतून जिवी जातली. हाचे भायर सरकारान एका कंपनी कडेन समन्वय पत्राचेर कबलात केल्या. हाचे प्रमाण हॉटेल, रेस्टॉरंट वा गाड्यांचेर वापरिल्लें रांदपाचें तेल परतून घेतलें आनी तातुंंतल्यान बायोडीझेल तयार करतले. तेल दिवप्यांक योग्य तो मोबदलो दितले.
पर्यावरण दिसा निमतान सरकार ग्रीन गोंय, निवळ गोंय उपक्रम तीन म्हयने चालीक लायतलें. ते प्रमाण राष्ट्रीय आनी राज्य म्हामार्गांचेर पाचवे कॉरिडोर तयार करपाचे यत्न करतले. ह्या उपक्रमांतल्यान ५ जून ते ५ सप्टेंबर ह्या काळांत पत्रादेवी ते पोळे मजगतीं १० लाख झाडां रोवपाचें लक्ष्य आमी थारायलां. ह्या उपक्रमांत सामान्य नागरिकां सयत पंचायती आनी नगरपालिकांनी वांटो घेवचो. खाजगी कंपनींनी सीएसआर वरवीं ह्या उपक्रमांत वांटो घेवचो. पर्यावरणाची राखण करप ही फकत सरकाराचीच न्हय तर सामुहीक जापसालदारकी.
देशांत पयलेच खेपे नवो अभ्यासक्रम
कोयर वेवस्थापन तंत्रगिन्यानाचो अभ्यासक्रम बेगीनूच राज्यांत सुरू जातलो अशें मुख्यमंत्र्यान सांगलें. असो अभ्यासक्रम देशांत पयलेच खेपे गोंयांत सुरू जातलो. हाचे वरवीं फुडाराक कोयर वेवस्थापनाक जाय आशिल्लें गरजेचें तंत्रीक मनीसबळ मेळटलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
