भांगरभूंय | प्रतिनिधी
पणजी : भौशीक सुवातेर कोयर उडयतनाचो व्हिडियो सोशल मिडियाचेर व्हायरल जालो. उपरांत ह्या प्रकरणांत म्हापशें पुलिसांनी ताचेर गुन्यांव दाखल केलो. ह्या ताणांतल्यान एका महाविद्यालयीन विद्यार्थ्यान स्वताचेर पिस्तुलाची गोळी घालून आत्महत्या केल्ल्याची दुर्दैवी घडणूक घडली. म्हापशेंच्या गावसावाडो वाठारांत घडिल्ले हे घडणुकेंत सॅम्युयल गार्विन दा ब्रागांझा (२३) हो तरणाटो सोंपलो. डिजिटल मळार ट्रोलींग, समाजीक प्रतिश्ठा आनी अचकीत आयिल्ले कायदेशीर प्रक्रियेचो तरणाट्याच्या मनाचेर कशे तरेन वायट परिणाम जावपाक शकता, हें हे घडणुकेंतल्यान मुखार आयलां आनी ही गजाल सामकी हुस्को करपा सारपा सारकी आसा.
आत्महत्येची घडणूक काल बिरेस्तारा रातच्या सुमार १२.४० वरांचेर घडली. सॅम्युयलान घरांतल्या बाथरुमांत वचून स्वताचेरूच गुळी मारली. रातचो अचकीत फाराचो व्हड आवाज आयिल्ल्यान ताच्या घरच्यांनी धांव घेतली तेन्ना आत्महत्येचो प्रकार उक्तडार आयलो. सॅम्युअल बाथरुमांत रक्तांत पडिल्लो. कुटुंबीयांनी ताका बेगोबेग म्हापशें हॉस्पिटलांत दाखल केलो. मात उपचारां पयलींच दोतोरांनी ताका मरण आयिल्ल्याचें सांगलें. म्हापशें पुलिसांनी घडणुके सुवातेर वचून पंचनामो केलो. ताची कूड सध्या पोस्टमार्टमा खातीर गोमेकॉंत धाडल्या.
सॅम्युयलाचो रस्त्या कुशीक कोयर उडयतनाचो व्हिडियो बुधवारा ३ जुनाक एका नागरिकान काडिल्लो. हो व्हिडियो बिरेस्तार सोशल मिडियाचेर व्हडा प्रमाणांत व्हायरल जालो. व्हायरल व्हिडियोची दखल घेवन म्हापशें पुलिसांनी भौशीक भलायकेक धोको निर्माण केल्ल्याच्या आरोपा खाला सॅम्युयला आड भारतीय न्याय संहितेच्या कलम २७१ आनी गोवा नॉन-बायोडिग्रेडेबल गार्बेज (कंट्रोल) कायद्या खाला गुन्यांव दाखल केल्लो. तशेंच काल ताका पुलीस स्टेशनांत आपोवन कायदेशीर नोटीस दिल्ली. हे अचकीत घडिल्ले घडामोडींक लागून आनी समाजीक बदनामीच्या भंयान सॅम्युयलान हें सामकें खर आनी चुकीचें पावल उखलिल्ल्याचें समजता. पुलीस फुडलो तपास करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
