भांगरभूंय | प्रतिनिधी
मुख्यमंत्री डॉ. सावंत हांणी वावड्यांक लायलो पूर्णविराम
स्थलांतरीतांच्यो बेकायदो वस्त्यो नियमीत करचो नात
फुडल्या काळांत चालीक लायतले म्हजो फ्लॅट येवजण
भांगरभूंय । प्रतिनिधी
मडगांव : मुख्यमंत्री डॉ. प्रमोद सावंत हांणी ‘म्हजें घर’ हे येवजणे संबंदांत पातळयतात त्या वावड्यांक पूर्णविराम दिवन ही येवजण फक्त पात्र गोंयकार कुटुंबां खातीर आशिल्ल्याचें सांगलें. बेकायदो न्हय जाल्यार अनियमीत घरां नियमीत करतात. लोकांनी कसलेच तरेच्या गैरसमजांक बळी पडचे न्हय, असोय तांणी उलो मारला.
मडगांवच्या रवींद्र भवनांत आयोजीत केल्ले कार्यावळींत मुख्यमंत्री डॉ. सावंत हांचे हाजिरेंत ‘म्हजें घर’ येवजणे खाला लोकांक तांच्या घरांच्यो आनी जमनीच्यो सनदी तशेंच प्रमाणपत्रां वांटलीं.
ह्या वेळार माचयेर खासदार सदानंद शेट तानवडे, सभापती गणेश गांवकार, मंत्री दिगंबर कामत, मंत्री सुभाष शिरोडकार, आदले मंत्री आलेक्स सिक्वेरा, आमदार आंतोन वाझ, निलेश काब्राल, सुभाष फळदेसाय, उल्हास तुयेंकार, आलेक्स रेजिनाल्ड आनी जिल्हा पंचायत अध्यक्ष सिद्धार्थ गांवस देसाय उपस्थीत आशिल्ले.
मुख्यमंत्र्यान सांगलें, म्हजें घर येवजण ही फकत 1972 वर्सा आदीं बांदिल्ल्या घरांनी रावपी पात्र गोंयकार कुटुंबा खातीर मर्यादीत आसा. ही येवजण खंयचेच तरेन स्थलांतरीतांच्यो बेकायदो वस्त्यो नियमीत करचे खातीर सुरू करूंक ना. हाका लागून सगळीं कागदपत्रां नाशिल्ल्यान आडकल्लीं घरां नियमीत जातलीं. खूबशीं कुटुंबा फाटल्या कितल्याश्याच दसकां सावन विशिश्ट जमनीचेर रावतात, मात फावोशीं कागदपत्रां नाशिल्ल्यान तांकां कायदेशीर आडखळींक फुडो करचो पडटा. हे येवजणे खाला कोमुनिदाद जमीन, सरकारी जमीन, पुनर्वसन प्लॉट, घृहनिर्माण मंडळाचे प्लॉट ह्या जमनींचेर आशिल्लीं आनी कागदपत्रां नाशिल्ल्यान आडकल्लीं घरां नियमीत जातलीं. कोमुनिदाद जमनीचेर लेगीत 40 वर्सां परस चड काळ लोक घरां बांदून रावतात. तीं बेकायदो आसल्यार तेन्नाच्या सरकारान कारवाय कित्याक करूंक ना आनी तीं मोडल्यार ते लोक खंय वतले, हो विचार करून 2014 च्या आदींचीं कोमुनिदाद जमनी वयलीं घरां लेगीत नियमीत करतात. कांय समितींनी अर्जांक मंजुरी दिल्या, हेरांनीय दिवची. जाय जाल्यार त्या काळा प्रमाण जमनीचो दर लेगीत घेवचो, अशेंय मुख्यमंत्र्यान सांगलें.
लोकांक अर्ज प्रक्रियेंत कसलीच अडचण येवची न्हय म्हूण प्रशासकीय यंत्रणा सक्रीय केल्या. हे येवजणे खातीर दोन हजार शुल्क निश्चीत केल्यात एक हजार उपजिल्होधिकारी कार्यालयांत आनी एक हजार पंचायतींत भरचे पडटले. अर्जदारांक पुराय प्रक्रिये वेळार मजत करचे खातीर महसूल अधिकारी, उपजिल्होदिकारी, मामलेदार आनी पंचायत सचीव मार्गदर्शन आनी मजत करतले, अशें मुख्यमंत्री डॉ. सावंत हांणी सांगलें. हे येवजणेच्या माध्यमांतल्यान खूबश्या दसकां सावन प्रलंबीत आशिल्ल्या घरांच्या मालकी हक्काचो प्रस्न सुट्टलो, अशें तांणी सांगलें.
गोंयांत 1972 आदींचीं जीं घरां आसात आनी जांचे कडेन मालकीचे कसलेच कागदपत्र ना अश्यो गोंयकार लोकांचीं घरां नियमीत करतात. 1980 त तेन्नाच्या सरकारान 20 कलमी येवजण हाडली आनी लोकांक प्लॉट दिले. ते उपरांत त्यो जमनी एकल्यान दुसऱ्याक आनी दुसऱ्यान तिसऱ्याक विकल्यो. जमनी दिल्यो, पूण तांकां जमनीची मालकी दिवंक ना. असोच प्रकार हावसींग बोर्डाचे बाबतींत जाला. जमनी आनी घरां दिलीं पूण तांचो मालकी हक्क खंयच्याच सरकारान दिवंक ना. साळावली धरणा खातीर लेगीत लोकांचें स्थलांतरण केलें, पूण तांकां दिल्ले जमनीची मालकी अजून लेगीत तांकां मेळूंक नाशिल्ली. तांकां जमनीचे मालकी हक्क दिवपाचें काम ह्या सरकारान केलां. लोकांच्यो जमनी नांवाचेर नाशिल्ल्यान तांकां ते खातीर न्यायालयीन लडो दिवचो पडटालो. पूण सरकारान म्हजें घर येवजणे खाला लोकांक कायदेशीर प्रक्रिया करून तांच्यो जमनी आनी घरां तांच्या नांवाचेर केल्यात. ही येवजण फटीची आशिल्ल्याचें आनी राजकी फायद्या खातीर आशिल्ल्याचें कोणेय सांगलें तरीय तें फट आसा. सरकारान दिल्लीं आस्वासना पुराय केल्यात. फक्त गोंयकार लोकांचीं घरां तांच्या नांवाचेर जावचीं ह्या उद्देशान ही येवजण चालीक लायल्या. जांणी सरकाराचे विस्वास दाखयलो तांकां सनद मेळटा, अशें मुख्यमंत्र्यान सांगलें. मजगतीं, कार्यावळी उपरांत प्रसार माध्यमां कडेन उलयतना मुख्यमंत्री डॉ. सावंत हांणी सांगलें, म्हजें घर येवजणे खाला जमनीचो मालकी हक्क दिला. हाच्या फुडल्या काळांत म्हजो फ्लॅट येवजण चालीक लायतले, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
