भांगरभूंय | प्रतिनिधी
एकूय बांगलादेशी सांपडूंक ना; गुन्यांव फांट्याची कारवाय
पणजी: गोंय पुलिसांच्या गुन्यांव फांट्यान गोंयांतल्या कावला अड्ड्यांचेर विशेश पडटाळणी मोहीम राबयली. हे मोहिमे खाला कामगारांची वळख पटोवप आनी बेकायदो स्थलांतरीत वा वैध कागदपत्रां बगर रावपी बांगलादेशी आनी हेर व्यक्तींचो सोद घेवप आशिल्लो. ह्या प्रकरणांत गुन्यांव फांट्यान 172 जाणांची चवकशी केली. तातूंत एकूय बांगलादेशी सांपडूंक नाशिल्ल्याची म्हायती मुखार आयली.
गुन्यांव फांट्याचे पुलीस अधिक्षक राहुल गुप्ता आनी जिवबा दळवी हांच्या मार्गदर्शना खाला गोंयांतल्या कावला अड्ड्यांचेर विशेश पडटाळणी मोहीम हातांत घेतिल्ली. ते खातीर गुन्यांव फांट्यान 9 पंगड तयार करून तपासणी केली. बेकायदो राबितो आनी गुन्यांवांक आळो घालपा खातीर विशेश मोहीम हातांत घेतल्या.
हे मोहिमे खाला म्हापशें, कोलवाळे, पर्वरी, बेती, मडगांव, दवर्ली, दिकलपाले, झुआरीनगर, कुठ्ठाळी सयत विवीध सुवातांनी 48 कावला अड्डे तपासले. पंगडांनी अड्ड्यांतले कामगार आनी तांची वळखपत्रां आनी वैयक्तीक म्हायती तपासली. ह्या वेळार सुमार 172 जाणांची चवकशी केली आनी तातूंत एकूय बांगलादेशी सांपडूंक नाशिल्ल्याची म्हायती मुखार आयली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
