भांगरभूंय | प्रतिनिधी
बायलांचो केलो भोवमान
पणजी: लोहपुरूस सरदार वल्लभभाई पटेल हांच्या जयंती निमतान एकात्मता दीस मनोवपाची जापसालदारकी भारत भारती संस्थे वतीन गोंय प्रभारी म्हूण लघुउद्देजक आनी आर्किटेक्ट वैशाली लवंदे हांचे कडेन सोंपयिल्ली.
हे कार्यावळीक मुखेल सोयरे म्हूण कारगील झुजांतले परमवीर चक्र सन्मानीत कॅप्टन योगेंद्र सिंह यादव हाजीर आशिल्ले. फक्त 21 व्या वर्सा देशा खातीर परमवीर चक्र मेळोवपी ते सगल्यांत तरणाटे कॅप्टन आसात. वास्कोचे आमदार कृष्णा साळकार आनी तांच्या पंगडान दाबोळी विमानतळार तांकां दबाज्यान येवकार दिलो.
देशप्रेम आनी भारतीय एकात्मतेचे भावनेन गोंयांत राबित्याक आशिल्ल्या विवीध प्रांतांतले नागरीक हे कार्यावळीक व्हड संख्येन हाजीर आशिल्ले. कॅप्टन योगेंद्र सिंह यादव हांणी कारगील झुजांत टायगर हिलाचेर जैत मेळमेरेनचे प्रसंग सांगलें. तांचें धाडस आयकून हाजीर आशिल्ल्यांचें मन देशभक्तीन आनी अभिमानान फुलून गेलें.
भारत भारतीचे अध्यक्ष विनयजी पत्राळे हांणी सरदार वल्लभभाई पटेल हांचो इतिहास विस्तारान सांगलो आनी राष्ट्रीय एकात्मतेचो संदेश दिलो.
खेळ, शिक्षण, वैजकी आनी समाजीक मळार तोखणायेचें कार्य करपी बायलांचो भोवमानूय ह्या वेळार केलो. समाजाचे उदरगती खातीर योगदान दिवपी ह्या विशेश बायलांक लोहपुरूस सरदार वल्लभभाई पटेल हांची प्रतिमा भेटोवन कॅप्टन योगेंद्र सिंह यादव हांचे हस्तुकीं भोवमान केलो.
कार्यावळींत विवीध राज्यांचे सांस्कृतीक सादरीकरण आनी परंपरीक व्यंजनांकूय विशेश प्राधान्य दिल्लें. अर्चना बेन शाह आनी अनील पाटील हांणी सुत्रसंचालन आनी अध्यक्षपदाची जापसालदारकी पार पाडून कार्यावळीची सोबा वाडयली.
हे कार्यावळीक विवीध मळा वेले मानेस्त व्हड संख्येन हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
