भलायकी केंद्रांचो दर्जो सुदारचो

भांगरभूंय | प्रतिनिधी

सरकारी हाॅस्पिटलांत वचप म्हणल्यार आदेस पिड्ड्यार अशें जायते जाण म्हणटात. तें चूक थारचें.

भलायकी हीच खरी संपत्त; पयसो त्या उपरांत येता, अशें महात्मा गांधीजी म्हणटाले. कूड निरोगी आसल्यार मन खोशी उरता आनी आनंदी मन हेंच यशाचें गुपीत. आयजूच भलायकेची जतनाय घेवपाक जाय. तशें केल्यार फाल्यां वखदांचेर खर्च करपाचो वेळ येवचो ना. पूण बरी भलायकी मेळप मनशाच्या हातांत आसताच अशें ना. कसलेंच वेसन नासतना रोग जातात. येत्या 11 जूना सावन उत्तर आनी दक्षीण गोंय जिल्हो हाॅस्पिटलांत केमोथेरपीचो उपचार सुरू जातलो. भलायकी मंत्र्यान तशी घोशणा केल्या. कॅन्सराच्या दुयेंतींत उपचारा खातीर जीएमसींत येवचें पडटा. आतां दुयेंतींक आनी तांच्या कुटुंबांक थाकाय मेळटली. सरकारी एम्बुलन्सांचोय 108 सेवेंत आस्पाव करतले. हरशी म्हूण त्यो चलतातूच अशें ना. चडशीं भलायकी केंद्रांय 108 चेरूच अवलंबून आसतात. निदान हे सेवेंतल्या एम्बुलन्सींचो आंकडो वाडटलो.
कॅमोथेरपी सुविधा सुरू करप हें म्हत्वाचें पावल. कारण आयज गोंयांत कॅन्सराचे दुयेंती वाडल्यात. केंद्र सरकाराचे आंकडेवारी प्रमाण, 2022 ते 2024 ह्या तीन वर्सांत 5218 नवे कॅन्सर दुयेंती मेळ्ळ्यात. 1700, 1735 आनी 1783 असो हो आंकडो. कॅमोथेरपी दोन कडेन सुरू जातकच जीएमसी वयलें वजें उणें जातलें. प्रवास आनी वाट पळयत बसप ही दुयेंतींची व्हडली समस्या ना जातली. गोंयांतली जिणेशैली बदलिल्ल्यान दुयेंसां वाडल्यांत. फुडाराक दोळ्यांचें दुयेंस वाडपाचें आसा. कारण मोबायल फोन आनी सोशल मिडिया. अपघातूय वाडटले. कारण मॅसेजी, व्हिडियो पळयत गाडी चलोवपी वाडत आसात. किडणीचे दुयेंतीय खूब जाल्यात. तांकां लागींच्या हाॅस्पिटलांत डायलिसीस करपाक मेळपाक जाय. तिवूय बी फुकटांत! गोडेंमूत तर 50 टक्के गोंयकारांक आसतलें. हीं दुयेंसां वाडल्यात, ताचेर सगलेच उलयतात. (खरें म्हणल्यार हें टाळपाक कितें करूंक जाय, ताचेर भासाभास जाय.) काल खुद्द मुख्यमंत्र्यानूच सांगलें, गोंयांतलें गोडेंमूत, उच्च रक्तदाब, मोटसाण आनी किडणीच्या दुयेंसाचें प्रमाण राष्ट्रीय सरासरी परस चड आसा. साकर, तेल उणें करप, भायलें जेवण, मिरची, रस्सा आॅम्लेट, शोरमा सारके जिनस टाळप, थंड पेयां ढोसप हाचेर नियंत्रण गरजेचें. व्यायाम, योगासनां, चलप जायच. गोंय निरोगी दवरतलो जाल्यार हें सगलें करचेंच पडटलें. तें पिरायेच्या 15-16 वर्सां सावन सुरू केल्यार बरें. ‘आतां खायना जाल्यार केन्ना म्हातारपणांत खातलो’ हो प्रस्न आतां पुरो. भलायकेची परिस्थितीच कठीण जाल्या. आतांच उपाय घेवंक नात जाल्यार फुडल्या 30- 40 वर्सांनी गोंयकारांची भलायकी इबाटली. वेळार पुश्टीक खावप, न्हिदप आनी व्यायाम हें आयचें वखद.
खाजगी हाॅस्पिटलांनी पॅकेज दितात. दोळे, रक्त तपासप, कार्डियोग्राम, इसीजी, सोनाग्राफी… हे खातीर 5 ते 10 हजार रुपया घेतात. तशी पॅकेज सरकारी हाॅस्पिटलांक दिवप शक्य ना? जाय जाल्यार थोडी फी घेवं येता. बिहारांतल्या खानसराक परवडटा जाल्यार सरकाराक तें कठीण न्हय. सरकारी हाॅस्पिटलांत वचप म्हणल्यार आदेस पिड्ड्यार अशें जायते जाण म्हणटात. तें चूक थारचें. कॅमोथेरेपी, एमआरआय, सीटी स्कॅन, न्यूरो सर्जनी, किडनी, काळीज, मेंदवाचे विभाग, आयसीयू, उमेदी, शांत तंत्रज्ञ, नर्सी, कर्मचारी जाय. रक्तपेढी, आॅक्सिजन तयार करपी विभाग, प्रयोगशाळा, मानसीक समुपदेशन केंद्र प्रत्येक हाॅस्पिटलांत आसचें. निदान तालुको हाॅस्पिटलांत! स्पेशालिस्ट दोतोर, सीटी स्कॅन, उपकरणां आनी तंत्रज्ञ नात म्हूण धारबांदोडेंचो दुयेंती फोंड्यां, थंय घाव्याक तिंतूर लावन धाडलो जीएमसींत अशें जावंक फावना.
हाॅस्पिटलांत काम करप ही सेवा, सरकारी नोकरी न्हय. भलायकी ही दरेकल्याची मुळावी गरज. सामान्य लोकांक सरकारी हाॅस्पिटलांच परवडटात. प्रत्येक भलायकी केंद्राचेर अत्याधुनीक सुविधा मेळ्ळ्यार तांकां जीएमसींत वच्चें पडचें ना. भौशीक भलायकीय सुदारतली.