भांगरभूंय | प्रतिनिधी
तीन दिसांनी पावस गोंयांत पावपाची शक्यताय
भांगरभूंय । प्रतिनिधी
पणजी : हवामान खात्यान आयतारा 4 जूनाक केरळांत पावस आयला अशें जाहीर केलां, हवामान अनुकूल आसल्यार फुडल्या दोन ते तीन दिसांनी पावस गोंयांत पावपाची शक्यताय खात्यान उक्तायल्या.
हेरशीं 1 जूनाक केरळांत पावस पावता. मात अंदूं केरळांत पावसा येवपाक 3 दीस कळाव जाला. हाचे आदीं खात्यान 26 मे दिसा केरळांत पावस येवपाची शक्यताय उक्तायल्ली. पूण अनुकूल हवामान नाशिल्ल्यान अंदूं पावस येवपाक कळाव जालो.
4 ते 8 जून ह्या काळांत गोंयांत वादळी वार्या सयत पावस पडपाची शक्यताय आसा. ते प्रमाण खात्यान ह्या पांच दिसां खातीर पावसाचो यलो अलर्ट जारी केला. बिरेस्तारा गोंयांतलें हवामान दमट आशिल्लें. कांय कडेन पावस पडपाची नोंद जाल्या.
गोंयांत 24 वरांत सरासरी 6 मिमी. ह्या काळांत मुरगांवां 33.2 मिमी आनी काणकोणां 15.8 मिमी पावस पडला. पावसाक लागून गोंयांतलें तापमान उणें जालां. फुडले स दीस गोंयांत चडांत चड तापमान 33 ते 34 अंश आनी उण्यांत उणें तापमान 25 ते 26 अंश सेल्सियस उरपाची शक्यताय आसा. अंदूं पावस सरासरी परस सकयल आसतलो असो अदमास हवामान खात्यान उक्तायला. पावसाच्या दिसांनी पॅसिफीक म्हासागरांत एल निनो हवामान यंत्रणा तयार जावपाची शक्यताय आसा. हाका लागून सरासरी 90 टक्क्यां मेरेन पावसाची शक्यताय खात्यान उक्तायल्या. फाटल्या वर्सा केरळांत पावस आठ दीस आदीं म्हणल्यार 24 मेक पाविल्लो. हाचे उपरांत फकत एका दिसांत म्हणल्यार 25 मेक पावस गोंयांत पाविल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
