भांगरभूंय | प्रतिनिधी
दर वर्सा 11- 26 दशलक्ष टन नुस्त्याचें लुकसाण जावपाक आययूयू नुस्तेमारी कार्यावळी जापसालदार आसात, जाचें अर्थीक मोल 10- 23 अब्ज डॉलर असो अदमास आसा.
नुस्तेकारी संवसारभरच्या लोकांक अन्न, रोजगार, मनरिजवण, वेपार आनी अर्थीक बऱ्यापणाचो म्हत्वाचो स्रोत दिता.
82 कोटीं परस चड लोक अन्न, पोशण आनी येणावळ हांचे खातीर नुस्तेकारी आनी जलसंवर्धन हांचेर आदारून आसात, पूण नुस्तेमारीच्या टिकावूपणाची खात्री करपाचे आंतरराष्ट्रीय समुदायाचे यत्न, बेकायदेशीर, अहवाल सादर न केल्ली, अनियंत्रीत नुस्तेमारी (Illegal, Unreported and Unregulated (IUU) Fishing) कार्यावळींक लागून दर्या पर्यावरणाचेर गंभीर परिणाम जावपाक लागल्यात.
संवसारीक वेपार संघटनेच्या मतान आययूयू नुस्तेमारी म्हणल्यार राश्ट्रीय, प्रादेशिक आनी आंतरराश्ट्रीय कायद्यांचो भंग करून केल्ल्यो नुस्तेमारी कार्यावळी; नुस्तेकारी कार्यावळी जांचे नुस्तेमारी विशीं म्हायतीचो अहवाल दिवप ना, चुकीचो अहवाल दिवप वा उणो अहवाल दिवप; खंयच्याय राज्यांत नोंदणी ना जाल्ल्या जहाजांनी नुस्तें मारप; प्रादेशिक नुस्तेमारी वेवस्थापन संघटनांच्या आज्ञापत्रा खाला आशिल्ल्या वाठारांनी बिगर सभासद बोटींनी नुस्तें मारप; आनी नुस्तेमारी कार्यावळी ज्यो राज्यांनी नियंत्रीत करूंक नात आनी जांचेर सहज नदर दवरूंक आनी जांचो हिशेब घेवंक मेळना.
संयुक्त राश्ट्रांच्या अन्न आनी शेतकी संघटनेच्या मतान दर वर्सा 11- 26 दशलक्ष टन नुस्त्याचें लुकसाण जावपाक आययूयू नुस्तेमारी कार्यावळी जापसालदार आसात, जाचें अर्थीक मोल 10- 23 अब्ज डॉलर असो अदमास आसा. आययूयू नुस्तेमारी कार्यावळींनी आमच्या दर्या संसाधनांच्या टिकावू वेवस्थापनाक धोको निर्माण जाता, ही परिस्थिती प्रमाणा भायर नुस्तें मारपाक लागून आनीक वाडल्या.
आययूयू नुस्तेमारी आड झुजपाचो दीस
2015 वर्सा भूंयमध्य दर्या खातीर आशिल्ल्या सामान्य नुस्तेमारी आयोगान बेकायदेशीर, अहवाल नाशिल्ल्या आनी अनियंत्रीत नुस्तेमारी आड झुजपाचो संसारिक दीस जाहीर करपाचो प्रस्ताव मांडलो.
नुस्तेमारी समितीन 5 जून हो बेकायदेशीर, अहवाल नाशिल्ल्या आनी अनियंत्रीत नुस्तेमारी आड झुजपाचो आंतरराष्ट्रीय दीस म्हूण जाहीर करपाच्या प्रस्तावाक मान्यताय दिली. बंदर राज्य उपाय करार आंतरराश्ट्रीय कबलात म्हणून अधिकृतपणान लागू जाल्लो दीस ही तारीख दाखयता.
डिसेंबर 2017 क संयुक्त राष्ट्र संघटनेच्या भौशिक सभेन टिकावू नुस्तेकारी विशींच्या वर्सुकी थारावांत 5 जून हो “बेकायदेशीर, अहवाल नाशिल्ल्या आनी अनियंत्रीत नुस्तेमारी आड झुजपाचो आंतरराष्ट्रीय दीस” अशें जाहीर केलें. ह्याच थारावांत संयुक्त राश्ट्रांनी 2022 वर्साक आंतरराष्ट्रीय कारागीर नुस्तेकारी आनी जलसंवर्धन वर्स अशेंय जाहीर केलां, जें संवसारांतल्या नुस्तेकारी कामगारांतले 90 टक्के काम करपी ल्हान प्रमाणांत नुस्तेकार आनी बायलां कडेन लक्ष केंद्रीत करपाक मदत करता.
– प्रकाश वा. कामत
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
