भांगरभूंय | प्रतिनिधी
लडाख: तेलंगणाचो तरणाटो गिर्यारोहक भुक्या यशवंत हाणें ‘हर शिखर पर तिरंगा’ हे आपले राष्ट्रीय मोहीमे खातीर लडाखच्या कोरझोक पर्वता वळींत ६,००० मिटरां परस उंचायेच्यो दोन कठीण तेंगश्यो पार करून येस मेळयलां.
उस्वास घेवपाक त्रास
हे मोहिमेंत सुरवेक सावन यशवंताक कठीण हवामानाचो आनी शारिरीक त्रासांक तोंड दिवचें पडलें. कोरझोक वाठारांत पावतकच कुडींतली ऑक्सिजनची पातळी ६६% इतली उणी जाली, जाका लागून तकली दुखप, घुंवळ येवप आनी अशक्तपणाचो त्रास जालो. २ दीस विसव घेतले उपरांत ताणें फुडली मोहीम सुरू केली. थंयचें तापमान मायनस १५ अंश इतलें उणें जाल्लें आनी थंड वारें सुटिल्लें. सुरक्षेचो विचार करून ताणें ‘माउंट कियागर री’ (६,१०० मी) वयर वचपाचो बेत रद्द केलो, पूण ताणें हार मानली ना.
तिरंगो हुबयलो
अशे कठीण परिस्थितींत लेगीत यशवंतान ‘माउंट नोमॅड्स’ (६,१२५ मी) आनी एक अनोळखी, अननमी तेंगशेर (६,०३७ मी) यशस्वीपणान पांय दवरलो. थंय आदीं कोणेंच पावल दवरिल्ल्याची नोंद ना. थंय पावन ताणें राष्ट्रध्वज आनी आसाम रायफल्सचा ध्वज हुबयलो.
ह्या ६,०३७ मिटर उंचायेच्या तेंगशेक यशवंतान देशसेवेक आपलें जिवीत ओपिल्ल्या फ्लाइंग ऑफिसर विनोद कुमार चामा हांच्या उगडासाक ‘माउंट विनोद कुमार चामा’ हें नांव दिवपाचो प्रस्ताव मांडला, जेणेकरून तांचो त्याग फुडल्या पिळगेक प्रेरणा दितलो.
यशवंताची कामगिरी
भुक्या यशवंत हाणें आदीं लेगीत आफ्रिकेंतलो ‘माउंट किलीमांजारो’, युरोपातलो ‘माउंट एलब्रस’, ऑस्ट्रेलियातलो ‘माउंट कोसिअस्को’ आनी भारतांतलो ‘माउंट गोरिचेन’ सर केल्यात. माउंट गोरिचेन सर करपी तो सगळ्यात ल्हान पिरायेचो गिर्यारोहक आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
