भांगरभूंय | प्रतिनिधी
पणजी : राष्ट्रीय कुटूंब भलायकी सर्व्हेक्षण अहवाला प्रमाण राज्यांतलें गोडेमुताचें, उच्च रक्तदाब आनी ओबॅसिटीचें प्रमाण राष्ट्रीय सरासरी परस चड आसा. ही एक धोक्याची घांट. हें टाळपा खातीर नेमान व्यायाम करप गरजेचें. जेवणांतली साकर, तेल उणें करप, भायलें जेवण, सॉफ्टड्रींक बंद करप गरजेचें. निरोगी गोंया खातीर भितरल्यान जागें जावप गरजेचें. हे खातीर सगळ्यांनी यत्न करचे असो उलो मुख्यमंत्री डॉ. प्रमोद सावंत हांणी मारलो. तांणी आपलो संदेश गोंयकारांत एका व्हिडियो वरवीं दिला. ह्यान पयलीं ‘भांगरभूंय’ दिसाळ्यान हो अहवाल उजवाडिल्लो.
गोंयकारां मदीं गोडेंमूत, उच्च रक्तदाब आनी मुत्रपिंडाची समस्या व्हड प्रमाणांत आसा. गोंयांत गोडेंमूत जावपाचें प्रमाण २६.२ टक्के जाल्यार राष्ट्रीय सरासरी ११.४ टक्के आसा. गोडेंमुताच्या मात्शें पयलींच्या टप्प्यार २०.३ टक्के गोंयकार आसात, जाल्यार हाची राष्ट्रीय सरासरी १५ टक्के आसा. गोंयांत उच्च रक्तदाबाचें प्रमाण ४८.८ टक्के जाल्यार राष्ट्रीय सरासरी ३५.५ टक्के आसा. गोंयांत ४४.४ टक्के जाल्यार देशांत २८ टक्के ओबॅसिटी आसा. गोंयांत मोठें पोट जावपाचें प्रमाण ५१.८ टक्के आनी देशांत ३९.५ टक्के आसा.
तांणी म्हणलें, हे विशीं लोकांनी आतांच्यानूच कृती सुरू करपाक जाय. सगळ्या दोतोरांनी लोकां मदीं ह्या दुयेंसां विशीं जागृताय करची. गोडेंमूत जाल्ल्या दुयेंतींक मूत्रपिंडाचे त्रास जावचे न्हय म्हूण खंयची जतनाय घेवची हाचेर दोतोरांनी मार्गदर्शन करचें. जेवणांतली साकर आनी तेल हांचें प्रमाण उणें करप वा पुरायपणान बंद केल्यार भलायके खातीर बरें.
ल्हान भुरग्यां सयत सगळ्यांनी प्रक्रिया केल्लें जेवण खावप वा भायलीं कोल्ड्रींक्स पियेवप बंद करचें. तशेंच नेमान व्यायाम, योगासनां, प्राणायाम करप गरजेचें.
हाचे आदीं जिल्लो हॉस्पिटल आनी गोमेकाॅ ह्या दोनूय हॉस्पिटलांनी किडनी डायलिसीस मशीनां आशिल्लीं. पूण आयज राज्यांतल्या ४० परस चड प्राथमीक आनी सामुदायीक भलायकी केंद्रांनी अशीं मशीनां लावचीं पडल्यांत. एका केंद्रांत चार ते पांच युनीट आसूनय दुयेंतींक वाट पळोवची पडटा. देखून तुमकां वा तुमच्या कुटुंबियांक डायलिसीस करचें पडटलें असो वेळूच येवपाक दिवचो न्हय, असो उलो मुख्यमंत्र्यान मारलो.
हेल्थ विथ आयुर्वेद आनीक एक म्हयनो
मुख्यमंत्र्यांनी सांगलें, ह्यान पयलीं राज्यांत ५ मे ते ५ जून मजगतीं हॅल्थ विथ आयुर्वेद उपक्रमाचें आयोजन केल्लें. राज्यांतल्या २० हजार परस चड जाणांनी ह्या उपक्रमाचो लाव घेतलो. हो उपक्रम ५ जून ते ५ जुलय मेरेन वाडोवपाचो निर्णय घेतला. फुडाराक कसलींच दुयेंसां जावचीं न्हय म्हणून आयजूच जतनाय घेवप गरजेचें. दिनचर्या आणि ऋतुचर्या योग्य रितीन पाळची.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
