भांगरभूंय | प्रतिनिधी
पणजी : गोंय मुख्याध्यापक संघटनेच्या सुचोवणे उपरांत २०२७ – २०२८ सावन शिक्षणीक वर्स पयलीं भशेन जून सावन सूरू करपाचो प्रस्ताव विचारांत आसा. संभधितांकडेन बसका जाले उपरांत हो प्रस्ताव सरकाराक सादर जातलो. सरकार निमणो निर्णय घेतलें अशी माहिती शिक्षण संचालक शैलेश झिंगडे हांणी दिली.
तापमान तशेंच हेर कारणांक लागून एप्रिलांत सामके उणे विद्यार्थी वर्गांतह हाजीर आसतात, अशी समस्या मुख्याध्यापक संघटनेन मांडल्या. हाका लागून ह्या प्रस्तावाचेर विचार सूरू आसा. राष्ट्रीय शिक्षण धोरणाच्या कार्यवायेक लागून २०२५_ २६ सावन एप्रिलांत वर्ग घेवपाचो निर्णय जाल्लो. एनईपी प्रमाण शिक्षणीक वर्सांत थारावीक वरांचे वर्ग पुराय जावपाक जाय. जुनांत वर्ग सूरू जाले जाल्यार शिक्षणीक वर्साच्या वेळापत्रकाची फेर आखणी करची पडटली, अशें श्री. झिंगडे हांणी सांगलें.
राष्टीय शिक्षण धोरणाच्या कार्यवाये खातीर ब्रिज अभ्यासक्रम सूरू करपाची गरज आशिल्ली. एप्रिलांत वर्गांत ब्रिज अभ्यासक्रम पुराय जातालो. जून सावन शिक्षणीक वर्स सुरू करपाच्या प्रस्तावाचेर विचार विनिमय सूरू आसा. शिक्षणीक वरां कशीं पुराय करचीं, हाचो विचार करून निर्णय जातलो, अशें राज्य शिक्षण संशोधन आनी प्रशिक्षण मंडळाची संचालक मेघना शेटगांवकार हाणी सांगलें.
एप्रील सावन वर्ग सुरू करपाच्या निर्णयाक पयलीं काय पालकांनी लेगीत विरोध केल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
