प्रशांती तळपणकार आनी महादेव गांवकार हांकां ‘भांगराळें गोंय अस्मिताय’ पुरस्कार

भांगरभूंय | प्रतिनिधी

21 वेर मडगांवां भेटवण सुवाळो

मडगांव: भांगराळें गोंय अस्मिताय संस्था कोंकणी भास, कला, संघटन आनी संस्कृतायेच्या मळार देखदिणो वावर केल्ल्या म्हालगड्यांचो ‘भांगराळो गोंयकार पुरस्कार’ दिवन भोवमान करता. ह्या वर्साचो ‘भांगराळो गोंयकार’ पुरस्कार आंतराष्ट्रीय सिने पुरस्कार फावो जाल्ल्यो सिने आनी नाट्य कलाकार, लेखिका प्रशांती तळपणकार हांकां फावो जाला.
‘भांगराळें गोंय’चे संस्थापक वांगडी सर्गेस्त नित्यानंद नायक हांच्या उगडासाक संस्थेन ‘नित्य युवा’ पुरस्कार चालीक लायला. कोंकणी कला, संघटन आनी कोंकणी भाशे खातीर सातत्यान वावर करपी तरणाट्याक हो पुरस्कार भेटयतात. ह्या वर्साचो ‘नित्य युवा पुरस्कार’ युवा कवी, कलाकार महादेव सातू गांवकार हांकां फावो जाला.
पुरस्कार भेटवण सुवाळो आयतार, 21 जुनाक मडगांवच्या रवीन्द्र भवनाच्या कॉन्फरन्स हॉलांत सांजे 4 वरांचेर जातलो. ही कार्यावळ सगळ्यां खातीर उक्ती आसा.
प्रशांती तळपणाकर हांणी विद्यार्थी चळवळींत वांटो घेवन वेगवेगळे प्रस्न पथनाट्यांतल्यान समाजा मुखार मांडल्यात. कोंकणी नाटक, एकांकी, फिल्म अशा कलाप्रकारांनीं अभिनय करून राज्य, राष्ट्रीय आनी आंतरराष्ट्रीय पांवड्यावेले पुरस्कार तांकां फावो जाल्यात. ‘दीर्घ मौन तें’ ह्या अनुवादीत पुस्तका खातीर तांकां 2017 वर्सा साहित्य अकादेमीचो अणकार पुरस्कार फावो जाला.
महादेव सातू गांवकार हांणी राष्ट्रीय आनी अखिल गोंय पांवड्यार जावपी कविता सर्तींनीं साबार इनामां जोडल्यांत. तांचो ‘वझरो’ हो कविता संग्रह उजवाडा आयला. सत्तरीचो लोकवेद, रणमाल्यांतल्यो जती, सोकारती, फुगडी, लग्नां गीतांच्या संकलनाचो वावर ते सातत्यान करतात. कोंकणी भजन, दिंडी, रणमालें अशा साबार कलाप्रकारांनीं गायन, वादन ते करतात.