भांगरभूंय | प्रतिनिधी
विद्यार्थ्यांच्या शिक्षणा खातीर कुंभ्रालळ गांवकारांचें श्रमदान
जोयडाः जोयडा म्हालांतल्या जंगलबेट ग्रामपंचायतीचे हद्दींतल्या कुंभ्राळ गांवांत लोकांनी विद्यार्थ्यांच्या शिक्षणा खातीर सगल्यां मुखार एकवटाचो आदर्श दवरला. गावाक जोडपी रस्त्या कुशीक भराव नाशिल्ल्यान ह्या गांवांत बससेवा बंद जाले उपरांत सुमार ३० ग्रामस्थांनी एक दीस आनी एक रात श्रमदान करून रस्त्याच्या कुशीक माती घालून भराव घालो.
कुंभ्राळ गांवाक जोडपी सुमार दोन किलोमीटर रस्त्याचे कडेक भराव नाशिल्ल्यान येरादारी धोक्याची जावन पडिल्ली. हाका लागून बस सेवा बंद केल्ली. हाचो फटको गांवचे विद्यार्थी आनी नागरिकांक बसतालो. गांवांत मुळाव्या शिक्षणा फुडल्या शिक्षणाची सुविधा नाशिल्ल्यान विद्यार्थ्यांक विद्यार्थ्यांना जंगलबेट हांगा वच्चें पडटालें. सध्या सुमार २० विद्यार्थी शाळा आनी महाविद्यालयीन शिक्षणा खातीर ह्या मर्गार निंबून आसात.
बस सेवा बंद जाल्ल्यान विद्यार्थ्यांचे शिक्षणीक लुकसाण जातलों असो भंय आशिल्लो. हो मार्ग दाट रानांतल्यान वता देखून विद्यार्थ्यांक अस्वल, रानदुकर आनी हेर रानवटी जनावरांक भियेत प्रवास करचो पडटालो. हाका लागून विद्यार्थ्यांचे सुरक्षेचो प्रस्नूय मुखार आयिल्लो. हाचेर उपाय म्हणून गांवकारांनी प्रशासनाची वाट पळयनासतना स्वता फुडाकार घेतलो. तरणाटे, बायलो आनी ज्येश्ठ नागरीक एकठांय येवन एक दीस आनी रात श्रमदान करून रस्त्याच्यो कुशी मातयेचो भराव घालो. कॉंग्रेस फुडारी रतन कलमणकर हांणी ह्या उपक्रमाक तेंको दिलो.
या श्रमदानांत दत्ता कदम, आनंद कदम, नामदेव कदम, कमलाकर कदम, दिनेश कदम, अनिल कदम, संतोष कदम, गीता कदम, मनीषा कदम, दीपा कदम, जानकी कदम, द्रौपदी कदम, पार्वती कदम, आनंदी कदम हांचे सयत सुमार ३० ग्रामस्थ वांटेकार जाल्ले.
गांवच्या लोकांनी रस्तो सुरक्षीत करपाचो यत्न केला, तरी संबंदीत खात्यान बेगोबेग तपासणी करून गरजेची दुरुस्ती करून कुंभ्राळ गांवाक बस सेवा सुरू करची अशी मागणी लोकांनी केल्या. विद्यार्थ्यांच्या शिक्षणाचो प्रस्न मतींत दवरून प्रशासनान बेगोबेग कार्यवाही करची अशी आस्त गांवकारांनी उक्तायल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
