भांगरभूंय | प्रतिनिधी
सुदिन ढवळीकारः बरो निर्णय घेवपा खातीर गिरीश चोडणकाराक भेटयली परबीं
पणजी: परतून, परतून उमेदवारी वा सुवार्था खातीर जे पक्ष बदलतात तांकां उमेदवारी न दिवपाचें धोरण भाजप, काँग्रेसी सयत हेर राष्ट्रीय पक्षांनी घेवपाक जाय. हाका लागून राजकारण शुद्द जावपा सयत बरे मनीस राजकारणांत येवप शक्य जातलें, अशें वीज मंत्री तशेंच मगोचे फुडारी सुदिन ढवळीकार हांणी सांगलें.
काँग्रेस पक्ष सोडून जे कोण गेल्यात तांकां परतून काँग्रेस पक्ष उमेदवारी दिवचो ना. पक्ष बदलूं विशीं पक्षाचें धोरण स्पश्ट आसा, अशें प्रदेश काँग्रेस अध्यक्ष गिरीश चोडणकार हांणी म्हणलें तें योग्य आसा. आलेबाय, कोलेबाय हांकां पक्षांनी उमेदवारी दिवपाक जायना. ह्या निर्णया खातीर प्रदेश काँग्रेस अध्यक्ष गिरीश चोडणकार हांकां हांव परबीं दितां, अशें सुदिन ढवळीकार हांणी म्हणलें.
एसटी आरक्षणाची कार्यवाहे उपरांत प्रियोळ मतदारसंघ एसटी खातीर आरक्षीत जावपाची शक्यताय आसा. प्रियोळ आरक्षीत जालो जाल्यार आदलो आमदार दीपक ढवळीकार खंयच्या मतदारसंघातल्यान वेंचणूक लडटलो? हे विशीं मात तांणी कसलीच जाप दिली ना. चवथी उपरांत हांव सगल्या गजालींचेर उलयतां, अशें तांणी सांगलें.
भायल्या राज्यांतल्यान गोंयांत वीज येवपी ग्रिडांत इबाड जाल्ल्यान म्हापशेंच्या उत्तर गोंय जिल्हो हॉस्पिटलांत विजेची समस्या निर्माण जाली. गोंयांत वीज भायल्या राज्यांतल्यान येता. वीज पुरवण करपी ग्रिडांत जाल्लो इबाड हो वीज खात्याच्या अखत्यारीत येना, अशें वीज मंत्री सुदिन ढवळीकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
