भांगरभूंय | प्रतिनिधी
शेतकार भावांनी उक्तायली खोस
वाळपय: सत्तरी म्हालांतलीं शेतां आनी उदका पुरवणे खातीर अंजूणें धरणाच्या आधुनिकीकरणा खातीर केंद्र सरकारा कडल्यान 250 कोटी रुपयांचो निधी मंजूर जाल्ल्याची म्हायती मुख्यमंत्री डॉ. प्रमोद सावंत हांणी दिली. ह्या निधीक लागून धरणाची तांक वाडोवप, कालव्यांचे नुतनीकरण, गळटी आडावप तशेंच शिंपणावळ वेवस्था अदीक कार्यक्षम करपाचें काम हातांत घेतले.
सरकाराच्या ह्या यत्नाक लागून शेतकार भावांनी समाधान आनी खोस उक्तायल्या. फाटल्या एका वर्सां सावन ह्या धरणाच्या वेवस्थापना कडेन सरकारान लक्ष दिवचें अशी मागणी सेगीत जाताली. ह्या धरणाच्या उदकाचेर खूबशे कडेन शेतां- बागायती निंबून आसा. केंद्र सरकारान व्हड प्रमाणांत ह्या धरणा खातीर खर्च करपाची तयारी दाखयिल्ल्यान आतां खऱ्या अर्थान बरे तरेचें वेवस्थापन जावपाची आस्त शेतकार भावांनी उक्तायली.
मुख्यमंत्री डॉ. प्रमोद सावंत हांणी हालींच नवी दिल्ली भोंवडेर केंद्रीय जलशक्ती मंत्री सी. आर. पाटील हांची भेट घेवन अंजूणें धरणाच्या सुदारणां विशीं विस्तारान चर्चा केल्ली. उपरांत केंद्र सरकारान ह्या म्हत्वाकांक्षी प्रकल्पा खातीर रोखडीच मंजुरी दिली.
मेळिल्ले अदीक म्हायती प्रमाण धरणाच्या मुखेल संरचणुकेची घटाय करतले. खूबशा वर्सां पयलीं बांदिल्ल्या ह्या धरणाची बुन्याद आनीक घटमूट जावची हे खातीर ह्या निधीचो वापर करतले. ताका लागून फुडारांत सुरक्षीततायेचे नदरेंतल्यान ही गजाल सामकी म्हत्वाची आसा.
आतां मेरेन परंपरीक पद्दतीन उदकाचें वेवस्थापन करतात. फुडारांत उदकाचें वितरण आनी वेवस्थापन आधुनीक तंत्रज्ञानाचो वापर करून करपाची गरज आसा. ह्या निधीचो वापर ह्या तंत्रज्ञाना खातीर करतले. फुडारांत अंजूणें धरण प्रकल्प हो सामको प्रभावीपणान शेतां- बागायाती बराबरच पियेवपाच्या उदका खातीर उपयुक्त पद्दतीन उजवाडा येतलो.
थळावे नागरीक आनी शेतकार संघटणांनी ह्या निर्णयाक येवकार दिवन निधीची प्रत्यक्ष अंमलबजावणी आनी कामांची वेळांत पुर्तताय जावप तितलेंच म्हत्वाचें आशिल्ल्याचें मत उक्तायलें. अंजूणें धरणाच्या आधुनिकीकरणाक लागून सत्तरी म्हालाच्या विकासाक नवी दिशा मेळटली अशी अपेक्षा नागरिकांनी उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
