भांगरभूंय | प्रतिनिधी
पणजीः रेव्ह्युलेशनरी गोवन्स पार्टीचे सांत आंद्रें मतदारसंघाचे आमदार विरेश बोरकर हांणी उत्तर गोंय जिल्होधिकार्यांची भेट घेवन तांच्या मतदारसंघांत वाडत आशिल्लीं पर्यावरण उल्लंघनां, जशीं की बेकायदेशीर जमीन भरप आनी दोंगर कातरप, हाचे आड प्रशासनान खर नदर दवरून कारवाय करपाची मागणी करपी एक सविस्तर निवेदन जिल्होधिकाऱ्यांक सादर केलें.
वाडत वचपी पर्यावरण ऱ्हासा विशीं हुस्को उक्तायतना आमदार बोरकर हांणी सांगलें की, ह्या सारकिल्ल्या बेकायदेशीर कृत्यांक लागून सांत आंद्रेंच्या सैमीक सोबीतकायेक आनी पर्यावरणीय संतुलनाक व्हड धोको निर्माण जाला. ह्या वाठारांतल्या सैमीक साधन संपत्तीचो फुडलो नाश जावचो न्हय म्हूण जिल्हो प्रशासनान देखरेख यंत्रणा घटमूट करची आनी सध्याच्या पर्यावरण कायद्यांची कडक अंमलबजावणी करची, अशी तांणी खर मागणी केली.
बेकायदेशीर जमीन बदलाक लागून जावपी पर्यावरणीय धोक्यांची म्हायती ह्या निवेदनांत सविस्तरपणान दिल्या. दोंगर कापप आनी बेकायदेशीर मातयेचो भर घालपाच्या गजालींक लागून थळाव्या जैवविविधतायेचो व्हड प्रमाणांत नाश जावंक शकता, सैमीक उदकाचे निचराे पद्दतींत अाडखळी येवंक शकतात आनी हो भाग पर्यावरणीय संकश्टां वटेन आकर्शीत जावपाक शकता, अशी भिरांत बोरकार हांणी उक्तायली.
शाश्वत उदरगत होच आमचो अग्रक्रम आसपाक जाय. आर्थीक वाड ही पर्यावरणाच्या विनाशाच्या जिवाचेर जावपाक जायना. राज्याच्या पर्यावरणाक दुशण हाडपी बेकायदेशीर कृत्यांचाे सोद घेवपा खातीर आनी तीं आडवपा खातीर संबंदीत सरकारी खात्यां कडेन लागींचो मेळ प्रशासनान सादचो. गोंयचे संवेदनशील सैमीक दायज फुडले पिळगे खातीर सांबाळून दवरपा खातीर सगल्यांनी मेळून यत्न करपाची गरज आसा, असो उलो बोरकार हांणी मारलाे.
निवेदनांत मांडिल्ल्या मुद्द्यांचेर सविस्तर विचार जातलो आनी कायद्या प्रमाण योग्य ती कारवाय रोखडीच जातली, अशें आश्वासन जिल्होधिकार्यांनी दिल्ल्याचे आमदार विरेश बोरकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
