भांगरभूंय | प्रतिनिधी
लायसियमांतलें शिक्षण पुराय जातकच, मॅट्रिक जातकच तांणी सरकारी सेवेंत प्रवेश केलो. आपले कर्तबगारीन तांणी मामलेतदार, डेप्युटी कलेक्टर अशी महत्वाची पदां भुशयलीं.
पिराय वाडली काय बऱ्याच लोकांक स्मरणशक्तीचो त्रास जाता. आपल्यां मनशांचीं नावां विसरतात, आवडट्या खिणाच्यो यादी धुसर जातात. पूण, कांय व्यक्तिमत्वां ह्या सगळ्यांक आडवाद आसतात. 3 जूनाक आपलो 100 वो वाडदिस मनोवपी रमेश वागळे, जांकां रमाकांत वागळे म्हूणनय वळखतात, हे एका विलक्षण व्यक्तिमत्वां मदले एक. ह्या पिरायेंतय ते लोक, घडणुको आनी बारिकसाणींची बरेतरेन याद दवरतात.
रमेश हे बहुआयामी व्यक्तिमत्व. तांचें कुटुंब एके काळार समाजिक, सांस्कृतिक आनी खेळां मळार मुखार आशिल्लें. व्हडलो भाव स. आनंद वागळे हांच्या सांगतान तांणी निल्लीच्या क्लबांत सक्रिय काम केलें आनी हेरां वांगडा मराठी नाटकांच्या आयोजनांत फुडाकार घेतलो. खेळाक तांचे जिणेंत म्हत्वाची सुवात. रमेश गोवा राज्यस्तरीय फुटबॉलपटू आशिल्ले. तांणी साळगांव ट्रॉफी, टासा पोर्तुगाल आनी पर्रा कप अशा नामनेच्या सर्तींनी आपल्या संघाचें प्रतिनिधित्व केलें. ते हुशार गोलकीपर आशिल्ले आनी आपल्या संघाचे कॅप्टनूय आशिल्ले. सुमार 15 वर्सां ते क्लबाक खेळ्ळे.
लायसियमांतलें शिक्षण पुराय जातकच, मॅट्रिक जातकच तांणी सरकारी सेवेंत प्रवेश केलो. आपले कर्तबगारीन तांणी मामलेतदार, डेप्युटी कलेक्टर अशी महत्वाची पदां भुशयलीं. आयज 100 वर्सांच्या पिरांयेतय रमेश आपल्या इश्टागतीच्या बळार, कुटुंबिक नातीं आनी समाजशील सभाव जपतात. पणतुरां, कुटुंबीय आनी हितचिंतकांच्या मोगान तांचीं जीण गिरेस्त जाल्या.
परिपक्वता, विनोदबुद्धी, जिद्द आनी आनंदी सभाव ह्या गुणां खातीर सगले तांकां मानतात. तांचें वाचन अजुनय चलता आनी कांय प्रमाणांत वेवसायीक बाबी तांकां खबर आसा. शतकपूर्तीच्या ह्या संस्मरणीय प्रसंगार, रमेश वागळे सेवा, क्रीडास्पृहा, सांस्कृतिक सहभाग आनी मनीसपणाची ऊब हांचें प्रेरणादायी देख दिता. ह्या भोवआयामी व्यक्तिमत्वाक शतायुशी वाडदिसाच्यो मना पासून शुभेच्छा!
वामन रा. नायक
99224 45059
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
