भांगरभूंय | प्रतिनिधी
पणजीः राज्यांत पावस पडपाक कळाव जाला तरी वेगवेगळ्या धरणांनी उण्यांत उणें एक म्हयनो उदक पावतलें इतलो सांठो उरला. फुडलो एक म्हयनो पावस नासलो तरी उदकाचो उणाव जावचो न्हय हाची जतनाय उदका संसाधन खातें घेतलें. गरज आसा थंय आमी प्रक्रिया करूंक नाशिल्लें उदक दिवपाक शकतात. अंजुणे आनी पंचवाडी धरणांत उण्यांत उणें एक म्हयनो आनी साळावले धरणांत दोन म्हयनो पावतलें असो उदकाचो सांठो आसा. लोकांक उदकाचो हुस्को करपाची गरज ना अशें मंत्री सुभाष शिरोडकार हांणी स्पश्ट केलें.
मजगतीं, मेळिल्ले म्हायती प्रमाण सध्या अंजुणें धरणांत सगळ्यांत उणो १४ टक्के उदकाचो सांठो आसा. पंचवाडी धरणांत २३ टक्के, जाल्यार दक्षिण गोंयची तान भागोवपी साळावली धरणांत २९ टक्के उदक उरलां. चापोलींत ४० टक्के, गावणें ४४ टक्के, तिळारींत ३२ टक्के उदक उरलां. अंदूं आमठाणे धरणांत सगल्यांत चड ५४ टक्के उदक सांठो आसा. ह्यान पयलीं गरज आसल्यार विवीध उपाय येवजण्यो राबोवन उदक सांठो चड काळ वापरपाक शक्य आशिल्ल्याचें जलस्त्रोत खात्यांतल्या अधिकार्यांनी स्पश्ट केलां.
राज्यांत मान्सून दाखल जाले उपरांत रोखडोच धरणांतलो रितो उदकाचो सांठो भरतलो. १ जून मेरेन हरशीं केरळांत मान्सून पावता. ते उपरांत हवामान अनुकूल आसल्यार सप्तका भितर तो गोंयांत पावता. पूण अंदूं केरळांत पावसाक येवपाक कळाव जाला. फुडल्या दोन ते तीन दिसांनी केरळांत पावस येवपाची शक्यताय हवामान खात्यान उक्तायल्या. ते उपरांत हवामान अनुकूल आसल्यार गोंयांत पावस पावपाक सात ते धा दीस लागपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
