भांगरभूंय | प्रतिनिधी
मडगांवां फाल्यां दक्षीण गोंयां खातीर सनदींचें वाटप
पणजी : सरकारी, कोमुनिदाद वा खासगी जमिनीवेलीं घरां नांवार करपी म्हजें घर येवजणे खाला ३ हजार सनदींची प्रक्रीया पुराय जाल्या. दक्षीण गोंयां खातीर फाल्यां मडगांवां जावपी कार्यावळींत १ हजारांवयर सनदींचें वांटप जातलें. उत्तर गोंयांतूय सनदी वाटपाची कार्यावळ जातली. हाका लागून येवजणे खाला बेगिनूच ५ हजार सनदींचें वाटप जातलें, अशें मुख्यमंत्री डॉ. प्रमोद सावंत हांणी सांगलें.
फाल्यां सकाळीं ११ वरांचेर मडगांव रवींद्र भवनांत सनद वाटपाची कार्यावळ जातली. मंत्रिमंडळ बसके उपरांत उलयतना तांणी ही म्हायती दिली. सरकारी जमनत आशिल्ली ९० टक्क्यां वयर घरां हीं गोंयकारांचीं आसा. सांगें, धारबांदोडा तशेंच हेर म्हालांनी सरकारी जमनीचेर गोंयकारांचीं घरां आसा. हीं घरां नांवार करपा खातीर पयशे फारीक करचे पडटा. सर्वेचेर आशिल्लीं १९७२ पयलींचीं घरां, खासगी जमनींतलीं घरां, कोमुनिदाद जमनींतलीं घरां नांवार करपा खातीरची ही येवजण आसा. कोमुनिदाद समितीन मान्यताय दिल्या उपरांतूच लोकांनी कोमुनिदादीच्या जमनीचेर घरां बांंदल्यां. अल्वारा जमनीवेलीं घरां लेगीत योग्य कागदपत्रां आसल्यार नांवार जातलीं. कांय जाणांनी कागदपत्रां सारकीं सादर करूंक नाशिल्ल्यान तांचे अर्ज प्रलंबीत आसात.तांणी सारकीं कागदपत्रां सादर करचीं, अशें मुख्यमंत्र्यांनी सांगलां.
आयोगा वरवीं सरकारी नोकर भरती पारदर्शकपणान आनी गुणवत्तेचेर आधारीत जावपा खातीर ती कर्मचारी भरती आयोगा वरवींच जातली, अशें मुख्यमंत्र्यांनी स्पश्ट केलें. हालींच जाल्ले आमदार, मंत्र्यांच्या बसकेंत कांय आमदारांनी कर्मचारी भरती आयोगाक विरोध केल्लो.
मंत्रीमंडळाचे निर्णय
एसटी खातीर मतदारसंघ आरक्षीत दवरपाचो निर्णय वेंचणूक आयोग घेतलो
येवपी विधानसभा वेंचणुकेंत एसटी आरक्षण लागू जावचें म्हूण सरकाराचे येत्न सुरू आसात. खंयचे मतदारसंघ आरक्षीत जातले ताचो निर्णय हांव घेवचो ना जाल्यार वेंचणूक आयोग घेतलें, अशें मुख्यमंत्र्यांनी सांगलें. सभापती गणेश गांवकार, आदिवासी कल्याण खात्याचे मंत्री रमेश तवडकार, आमदार गोविंद गावडे, आमदार अँथनी वाझ हांणी भेट घेवन एसटी आरक्षणाविशी निवेदन सादर केल्ल्याची म्हायती मुख्यमंत्र्यांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
