भांगरभूंय | प्रतिनिधी
पणजीः राष्ट्रीय कुटुंब भलायकी सर्वेक्षण (एनएफएचएस-६) अहवाला प्रमाण गोंयच्या गांवगिर्या वाठारांतल्या बायलां मदीं उच्च रक्तदाबाचें प्रमाण शारांतल्या बायलां परस चड आसा. ह्या अहवाला प्रमाण गांवगिर्या वाठारांतल्या २७.८ टक्के बायलांक उच्च रक्तदाब जाता, जाल्यार शारांनी २४.९ टक्के बायलांक उच्च रक्तदाब आसा.
भलायकी तज्ञांच्या म्हणण्या प्रमाण जिणे पद्दत बदलप, असंतुलीत आहार, वाडपी ताण आनी भलायकी तपासणे कडेन आडनदर हीं उच्च रक्तदाब वाडपा फाटलीं मुखेल कारणां. विशेश म्हळ्यार भलायकी सुविधांची मर्यादीत उपलब्धताय आनी नेमान तपासणी नाशिल्ल्यान ही समस्या खास करून गांवगिर्या वाठारांनी चड गंभीर जायत आसा अशेंय सांगलें.
उच्च रक्तदाबाचे धोके आनी उपाय
उच्च रक्तदाबाक लागून काळजाचें दुयेंस, स्ट्रोक, मुत्रपिंडाचें दुयेंस अशे गंभीर भलायकेचे त्रास जावंक शकतात. देखून बायलांक नेमान रगतदाब तपासप, समतोल आहार घेवप, व्यायाम करप आनी ताण नियंत्रणांत दवरप गरजेचें अशें भलायकी तज्ञांनी सांगलें. गांवगिर्या वाठारांतल्या बायलांचे भलायके संबंदी जागृताय आनी प्रतिबंधात्मक उपाय चालीक लावपाची गरज ह्या आंकडेवारींतल्यान स्पश्ट जाल्या.
केंद्रीय भलायकी मंत्रालयान २०१९-२१ वर्सा केल्ल्या सर्वेक्षणाचेर आदारीत एनएफएचएस-५ जाहीर केल्लो. २०२३-२४ वर्सा एकठांय केल्ले म्हायतीचेर आदारीत एनएफएचएस-६ अहवाल जाहीर केला. वयली आंकडेवारी ह्या अहवालांतल्यान भायर आयल्या.
गोंयांत गोडेंमूत, उच्च रक्तदाब, ओबॅसिटी चड
गोडेंमूत, उच्च रक्तदाब, ओबॅसीटीचें प्रमाण गोंयांत वाडलां. राष्ट्रीय कुटुंब भलायकी सर्वेक्षण-६ (एनएफएचएस) अहवाला प्रमाण गोंयांत तिनूय दुयेंसांचें प्रमाण राष्ट्रीय सरासरी परस चड आसा.
एनएफएचएस-५ च्या मतान १५ वर्सां वयर दादल्यांमदीं गोडेंमूत जावपाचें प्रमाण २४.१ टक्के, उच्च रक्तदाब २६.८ टक्के आनी ओबॅसीटीचें प्रमाण ३२.६ टक्के आशिल्लें. एनएफएचएस-६ त हें प्रमाण अनुक्रमान ३२.१ टक्के, २७.५ टक्के आनी ४३.६ टक्के आशिल्लें
बायलां मदीं गोडेमुताचें प्रमाण २०.८ टक्क्यां वेल्यान २७.५ टक्के
दोन वर्सांत १५ वर्सां वयर आशिल्ल्या बायलांमदीं उच्च रक्तदाबाचें प्रमाण मात्शें उणें जालां. बायलां मदीं गोडेंमूत जावपाचें प्रमाण २०.८ टक्क्यां वयल्यान २७.५ टक्क्यां मेरेन वाडलां. ओबॅसिटीचें प्रमाण ३६.१ टक्क्यां वयल्यान ४५.१ टक्क्यां मेरेन वाडलां. एनएफएचएस-६ च्या मतान गांवगिर्या बायलां मदीं गोडेंमूत जावपाचें प्रमाण २७.७ टक्के आसा, जाल्यार शारांतल्या वाठारांनी २७.४ टक्के आसा. शारांतल्या दादल्यांमदीं गोडेंमूत जावपाचें प्रमाण ३६.३ टक्के जाल्यार गांवगिर्या वाठारांनी २७.४ टक्के आसा. शारांतल्या दादल्यांमदीं उच्च रक्तदाबाचें प्रमाण २६.३ टक्के, जाल्यार गांवगिर्या वाठारांनी २९ टक्के आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
