भांगरभूंय | प्रतिनिधी
पणजीः फाटल्या स वर्सांत शंबर परस चड शेतकारांनी आपली 123 हॅक्टर पडीक जमीन परतून लागवडी खाला हाडल्या. गोंय सरकाराच्या खासा येवजण्यांक लागून हीं शेतां पाचवीशार करप शेतकारांक येस फावो जालां. सरकारान फाटल्या 6 वर्सांच्या काळांत 19.41 लाख इतले अनुदानाचेर खर्च केल्यात, अशी म्हायती शेतकी संचालनालयांतल्या वरिश्ठ अधिकाऱ्यान दिली.
पडींग जमीन लागवडी खाला हाडपा खातीर आनी गोंयकारांक परतून शेतांनी देंवपाक प्रोत्साहन दिवपा खातीर शेतकी खात्यान विवीध पावलां उबारल्यांत, अशी म्हायती शेतकी खात्यातल्या वरिश्ठ अधिकाऱ्यान दिली.
हाचोच एक भाग म्हूण शेतकी खात्यान पडींग शेतां ओंपपां खातीर एक खेपेचे सहाय्य (वन टायम एसीटन्स) ही येवजण चालीक लायल्या. शेतांतली नडणी काडून ताची मशागत करून ती पिकावळ योग्य करपा खातीर दर शेतकाराक दर हॅक्टरा फाटल्यान रु. 15,000 मेरेन अनुदान शेतकी खातें दिता. ह्या अनुदाना खातीर खूबशे शेतकार परतून शेतांनी देंवून शेतां पाचवीशार करपाक लागल्यात. हातूंत माक्नाचो आनी मानायाचो वापर करून नडणी काडून, जोत लावपा खातीर हें अनुदान मेळटा, अशी म्हायती वरिश्ठ अधिकाऱ्यान दिली.
फाटल्या स वर्सांच्या काळांत हे येवजणेचो 102 शेतकारांनी लाव घेवन आपली 123 हॅक्टर पडीक जमनीचेर शेतांचो मळो फुलयला. ह्या काळांत गोंय सरकारान 34 लाख इतली अर्थसंकल्पीय तरतूद केल्ली तातूंतले 57 टक्के निधीचो वापर जाला.
हे येवजणे खातीर सगल्यांत चड प्रतिसाद वर्स 2021-22त मेळ्ळा. ह्या वर्सा सगल्यांत चड 25 शेतकारांनी आपली 52 हॅक्टर पडीक जमीन लागवडी खाला हाडिल्ली. सरकारान ह्या वर्सा 9 लाख रुपयांची तरतूद केल्ली आनी तातूंतले 7 लाख रुपया अनुदानाचेर खर्च केल्ले. उरिल्ल्या वर्सांत 5 लाख इतल्या निधीची तरतूद केल्ली आनी सरासरी 3 ते 1 लाख इतले अनुदानाचेर खर्च जाल्यात.
वर्स 2020-21त 5 लाखांची तरतूद जाल्ली तातूंतले 63 टक्के, 2021-22त 9 लाखांची तरतूद जावन 88 टक्के, 2022-23त 5 लाखांची तरतूद जावन 74 टक्के, 2023-24त पांच लाखांची तरतूद जावन 37 टक्के, 2024-25त पांच लाखांची तरतूद जावन 21 टक्के आनी 2025-26 त पांच लाखांची तरतूद जावन 32 टक्के निधीचो वापर अनुदान वांटपाचेर जाल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
