भांगरभूंय | प्रतिनिधी
ऑक्सिजनाच्या उणावाक लागून नुस्तें मरपा फाटलो उक्तायलो अदमास
पणजीः मळ्यांतल्या तळ्या उपरांत कांपाल तळ्यांत आतां नुस्तें मरपाची घडणूक उक्तडार आयल्या. मंगळारा रातयां कांपाल लेक व्ह्यू कॉलनींतल्या तळ्यांत शेंकड्यांनी नुस्तें मरून वयर उफेतालें. हें नुस्तें मरपा फाटल्यान कारण अजून स्पश्ट जावंक ना. सिवेजीच्या उदकाक लागून तळ्यांत जाल्लो ओक्सिजनाचो उणाव, हें नुस्तें मरपा फाटल्यान कारण आसुये असो अदमास अधिकाऱ्यांनी उक्तायला.
कांय म्हयन्यां पयलीं नेवगी नगर मळा ह्या तळ्यांत हजारांनी नुस्तें मरून पडिल्लें. सिवेजीच्या उदकाचें प्रमाण वाडिल्ल्यान हें नुस्तें मरपा फाटलें कारण मुखार आयिल्लें. तशेंच हे घडणुकेची स्वेच्छा दखल लेगीत उच्च न्यायालयान घेतल्या आनी ताचेर सुनावणी चालू आसा. ही घडणूक ताजी आसतनाच कांपाल तळ्यांत परतून एक फावटी अशे परिस्थितींत नुस्तें मरपाची घडणूक घडली.
नुस्तें मंगळारा उसरां रातचें मेल्ल्याचें कळटा. पूण बुधवारा सकाळीं ह्या तळ्या कुशीक पासय मारपी थळाव्यांचे नदरेक हें मेल्लें नुस्तें नदरेक पडलें. उपरांत पणजी म्हानगरपालिकेच्या मानायांनी व्हड्याचे मजतीन हें मेल्लें नुस्तें भायर काडलें. ह्या वेळार तळ्याचें उदक काळें आनी उदका भितर प्लास्टीक कोयर भरिल्लो.
ह्या तळ्याचो एक फांटो सांत इनेज खारजाक वचून मेळटा आनी भरती वेळार हें उदक तळ्यांत वता. ह्या तळ्याच्या दाराचेर एक मानस मारल्या. पूण हे मानशेच्या दाराक लुकसाण जावन खारजातल्या सिवेजीचें उदक तळ्यांत वचून उदक दुशीत जावन नुस्तें मेलां आसुये असो अदमास म्हानगरपालिकेच्या अधिकाऱ्यांनी उक्तायला.
ह्या सोबीत तळ्यांत सिवेज सोडल्या आनी सगले कडेन कोयर हाडून उडयला. म्हापौर, स्मार्ट सिटी आनी सिवरेज खातें मेळून हें तळें नितळ करपाक जाय, अशी मागणी थळावे नगरसेवक लियोनीड फुर्तादो हांणी केल्या.
आमी स्मार्ट सिटी खाला 1 हजार कोटी मोडून लेगीत हें तळें जाग्यार घालपाक शकना जाल्यार फायदो कितें. आमी ह्या तळ्याचें रुपांतर व्हॅनिसांत करपाक शकतात. हो वाठार सोबीत आसून बरे लोक हांगा रावतात. पूण ह्या तळ्यांत उडयिल्लो कोयर आनी सिवेजीक लागून उदक पाचवें आनी काळें पडलां. म्हानगरपालिका आनी स्मार्ट सिटींत समन्वय आसा काय ना, असो प्रस्न फुर्तादो हांणी केलाे.
भरते वेळार सांत इनेज नाल्यातलें घाण उदक आनी प्लास्टीक तळ्यांत येता. आमी त्या वेळार तळ्याच्या स्त्रोता मुखार गेट घाल्ली. ती गेट सारकी चलता काय ना खबर ना. आनी म्हानगरपालिकेन हातूंत लक्ष घालपाक जाय. रातच्या वेळार सिवेज खातें नाल्यात घाण सोडटात आनी ती तळ्यांत येता. म्हानगरपालिका आनी सिवेज खात्यान हातूंत लक्ष घालचें, अशी मागणी आदले नगरसेवक सुरेंद्र फुतार्दो हांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
