विकास ही सेगीतची प्रक्रिया; ती केन्नाच थांबना: श्रीपाद नायक

भांगरभूंय | प्रतिनिधी

प्रियोळ मतदारसंघांत खासदार निधी खाला दोन प्रकल्पाचें लोकार्पण

पणजी: विकास हो केन्नाच थांबना. ती एक सेगीतची प्रक्रिया आसा. खरें म्हणल्यार सरपंच आनी आमदार हांचे मदीं सुसुत्रताय निर्माण जायत जाल्यार विकासाक गती मेळटा अशें केंद्रीय मंत्री श्रीपाद नायक हांणी म्हणलें.

प्रियोळ मतदारसंघांत खासदार निधी खाला दोन प्रकल्पांचें लोकार्पण करपाचे कार्यावळींत खासदार श्रीपाद नायक उलयताले. ह्या वेळार प्रियोळचे आमदार गोविंद गावडे, सावय वरेंचे सरपंच विनायक वेंगुर्लेकार, उपसरपंच मिताली एम. शेट, पंच वांगडी आनी सावय वेरेंचे ग्रामस्थ हाजीर आशिल्ले.

केरी, फोंड्यां केरी ग्रामपंचायत घरा भोंवतणचे सुवातेची सोबितीकरण आनी राखणे वणटीचें बांदकाम आनी वळवय ग्रामपंचायत वाठारांत वळवय बस स्टॅण्ड ते तिस्क सांतेरीभाट रस्तो आनी पदपथाचें बांदकाम आनी सोबितीकरण अशे दोन प्रकल्प केंद्रीय मंत्री श्रीपाद नायक हांचे हस्तुकीं लोकार्पण केले. दोनूय प्रकल्प मेळून सुमार 63 लाख 50 हजार रुपया खर्च केले.

डबल इंजीन सरकाराक लागून गोंयच्या विकासाक गती मेळ्ळ्या. केंद्र सरकाराच्या सहकार्याक लागून आनी लोकांनी दिल्ल्या मोगाक लागून उत्तर गोंयांत सुमार 1500 ल्हान व्हड प्रकल्प हांव पुराय करूंक शकलों अशें मंत्री नायक हांणी सांगलें.

18व्या लोकसभा कार्यकाळांत केंद्रीय मंत्री श्रीपाद नायक हांणी खासदार निधी आनी सीएसआर निधी खाला उत्तर गोंयांत विकासकामांचो धडाको लायला.

शाळां खातीर संगणक विशया वेलें साहित्य, सीसीटीव्ही आनी स्कूल बशी, दिव्यांग व्यक्ती खातीर तीन चाकी स्कुटर, कृत्रीम अवयव, ग्रामपंचायती खातीर कूड व्हरपी वाहन, एम्बुलन्स, कोयर व्हरपी वाहन, सौर उर्जा प्लांट्स आदीं विकास कामां पुराय केल्यांत आनी खूबशीं कामां पुराय जावपाचे वाटेर आसात अशें नायक हांणी म्हणलें.