भांगरभूंय | प्रतिनिधी
मालकी हक्क येवपी एका म्हयन्या भितर दितले
वास्को : फाटल्या कितल्याशास दसकां सावन वाट पळोवपी सड्यावेले जीआरबी गृहनिर्माण वसणुकेंतल्या ३५० परस चड कुटुंबांक निमाणें थाकाय मेळ्ळी. जीआरबीचे अध्यक्ष राजेश फळदेसाय हांणी गृहनिर्माण युनिट्सचो मालकी हक्क येवपी एका म्हयन्या भितर हांगां रावपी कुटुंबांक दितले, अशी घोशणा मंगळारा केल्या.
ह्या म्हत्वाच्या निर्णया उपरांत मुरगावचे आमदार संकल्प आमोणकार हांणी मुख्यमंत्री डॉ. प्रमोद सावंत हांचे उपकार मानल्यात. आमोणकार हांणी सांगलें, ह्या प्रस्नाविशीं तांणी मुख्यमंत्र्यां कडेन फाटपुरवण केल्ली. उपरांत मुख्यमंत्र्यांनी हस्तक्षेप करून दरेका घरा खातीर आकारपी शुल्क फकत १,००० रुपया प्रति युनिट इतलें निश्चीत केलें.
फाटल्या कितल्याशाच वर्सां सावन मालकी हक्काची वाट पळोवपी हांगच्या कुटुंबां खातीर हो निर्णय इतिहासीक थारतलो. हाका लागून शेकड्यांनी कुटुंबांचें तकलेवेलें अनिश्चिततेचें सांवट पयस जातलें. मालकी हक्क मेळ्ळे उपरांत हांगा रावतल्यांक तांच्या घरां विशीं कायदेशीर सुरक्षितताय मेळटली. फुडाराक वेव्हारूय सुरळीत जातलो.
हे घोशणेक लागून सडा वाठारांतल्या लोकां मदीं समाधानाचें वातावरण आसा. फाटलीं कितलींशींच वर्सां प्रलंबीत आशिल्लो प्रस्न सध्या सुटिल्ल्यान लोकांनी खोस उक्तायल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
