भांगरभूंय | प्रतिनिधी
पणजीः स्मार्ट वीज मिटर सक्तीन लावपा विशीं मानवी हक्क आयोगाची सुनावणी मंगळारा सुरू जाली. ह्या वेळार वीज खात्या वतीन अभियंता काशिनाथ शेट्ये, मयूर हेदे , जाल्यार प्रतिपक्षा वतीन एल्विस गोम्स हाजीर आशिल्ले. आयोगान ह्या प्रकरणांत एडव्होकेट एमआयकस क्युरी नेमपाचो निर्णय घेतलो. वीज गिरायकांचो आंकडो ७ लाखां परस चड आसा. दरेकी जाण आयोगा कडेन गेल्यार ह्यो सुनावण्यो करप अशक्य जातलें. हाका लागून आयोगान एमआयकस क्युरी नेमपाचो निर्णय घेतला. दोनूय पक्षांक ह्या क्युरी कडेन आपली बाजू मांडपाक सांगलें. हाची फुडली सुनावणी २४ जुनाक जातली.
हे विशीं एल्विस गोम्स हांणी सांगलें, क्युरी म्हणून कोणाची नियुक्ती करपाची हाचो निर्णय आयोग घेतलें. हाचें नांव बेगीनूच कळयतले.ह्यान फुडें दोनूय पक्ष ह्या क्युरीकडेन आपली बाजू मांडटले. सध्या खात्या वतीन स्मार्ट मिटर जरी बसयता आसतले तरी खुबश्या गिरायकांक आपले मिटर बदलिल्ल्याची म्हायती नासता. आमचे नदरेन हो मानव अधिकारांचो भंग जावन आसा. केंद्रीय मंत्र्यांनीय लोकसभेंत मिटर सक्तीचे नाशिल्ल्याचें सांगिल्लें. ह्यान पयलीं आयोगान ह्या प्रकरणाची स्वच्छ दखल घेतिल्ली. सध्या बेगीनूच आयोग हे विशीं निर्णय घेतलें. अशें जरी आसलें तरी आमी क्युरी मुखार आमची बाजू तपशीलाचेर मांडटले.
काशिनाथ शेट्ये हांणी सांगलें, आमकांय आयोगाच्या दरेका दुबावांच्यो तपशीला प्रमाण जापो दिवपाक जाय. स्मार्ट मिटराक लागून गिरायकांचोच फायदो जातलो. हातूंत आधुनीक तंत्रज्ञानाचो वापर केल्ल्यान अॅपाचेर गिरायकांक सगली म्हायती मेळटली. महाराष्ट्र वा उत्तर प्रदेश हीं व्हड राज्यां. थंये स्मार्ट मिटर बसोवपाची प्रक्रिया आनी गोंय सारकिल्ल्या ल्हान राज्यांतली प्रक्रिया वेगळी आसा.
हाका लागून हेर राज्यांची गोंयां वांगडा तुळा करची न्हय. स्मार्ट मिटरा विशीं सामान्य गिरायकांक कसलोय दुबाव आसल्यार तांणी खात्या कडेन संपर्क करचो.
धा दिसांनी अॅप लॉंच
हेदे हांणी सांगलें, सध्या स्मार्ट मिटर अॅऍपाचें टेस्टींग निमाण्या टप्प्यांत आयलां. फुडल्या सात ते धा दिसांनी तें लॉंच करतले. तें वापरपाक सोंपें आनी सुरक्षीत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
