युती वांगडा योग्य रणनिती आंखून भाजपाक हारयतले: गिरीश चोडणकार

भांगरभूंय | प्रतिनिधी

पणजीः भाजपा सरकारान १५ वर्सां पुराय केल्यांत. लोक भाजपाचेर उबगल्यात. विरोधी पक्षांची युती वा योग्य रणनिती नियोजीत करून येवपी वेंचणुकेंत भाजपाक हारोवन कॉंग्रेस सरकार हाडप हो म्हजो हेतू आसा, अशें नवे राज्य कॉंग्रेसीचे अध्यक्ष गिरीश चोडणकार हांणी सांगलें. हांव अध्यक्ष आसतना ३७ जाणांक उमेदवारी दिल्ली. तातुंतल्या एकाय मनशान अजून पयशे दिल्यात अशें सांगूंक ना, तिकेट विकपाचो आरोप तांणी न्हयकारला.
अमित पाटकार हांच्या जाग्यार कॉंग्रेसीन गिरीश चोडणकाराक हांची राज्य अध्यक्ष म्हणून नेमणूक केल्या. हाचे उपरांत ते आमच्या प्रतिनिधी कडेन विवीध विशयांचेर उलयले.
भाजपा सरकाराचो भ्रश्टाचार आनी गैरवेव्हाराक गोंयची जनता उबगल्या. मुख्यमंत्री डॉ.प्रमोद सावंत भाजपा सयत हेर पक्षांच्या वेव्हाराचेरूय नदर दवरतात. २०२२ वर्साचे वेंचणुकेंत आरजीक लागून ७ मतदारसंघांनी धपको बसलो. भाजपा परस आमकां ९ सुवातो उण्यो मेळ्ळो, तरी मतांचो फरक फकत २५००चो आसा. तृणमूल आनी आप हांकां लागून धर्मनिरपेक्ष मतांय वांटून गेल्लीं. २०१७ उपरांत भाजपाची मत टक्केवारी वाडूंक ना. मतांनी फूट पडून कॉंग्रेसीक अपेस सोंसचें पडलें. हे खेपे कॉंग्रेसीक जाय तशेंच वातावरण आसा. ह्या अनुकूल वातावरणाचो फायदो घेवन युती वांगडा योग्य रणनिती आंखतले. २०२७ वर्सा कॉंग्रेस सरकार हाडप हो म्हजो हेतू आसा, अशें गिरीश चोडणकार हांणी सांगलें.
फाटले वेंचणुकेंत म्हज्या कार्यकाळांत ३७ जाणांक उमेदवारी दिली. तातूंतल्या खंयच्याच मनशान पयशे दिले अशें सांगलें ना. तशेंच, साडे चार वर्सां उपरांत आतां मिकी पाशेकोन हो आरोप करपाक कितें कारण काय? वेंचणुके वेळार उमेदवाराक ताची खर्च करपाची तांक विचारतात. सगलेच पक्ष खर्च करपा विणीं उमेदवाराची तयारी विचारतात. त्या वेळार प्रभारी आशिल्लो दिनेश गुंडू राव हांणी मिकीक हे विशीं विचारिल्लें आसूंक जाय. हातूंत कांयच वायट ना.
सध्या सगल्या पंचायतींनी समिती तयार करून पक्षाचें काम मुखार व्हरप हें म्हजें प्राधान्य आसतलें. पक्षाच्या वावराचेर हांव भर दिवपाचो आशिल्ल्यान वेंचणूक लढोवपाचो सध्या तरी प्रधान्यान विचार ना. गोवा फॉरवर्डाची युती आसा आनी सध्या विजय सरदेसाय हांचे कडेन बरे संबंद आसात अशें गिरीश चोडणकार हांणी सांगलें.