भांगरभूंय | प्रतिनिधी
नवी दिल्ली/ तिरुवनंतपुरम: कॉंग्रेसचे खासदार शशी थरूर हांणी सरकारी कार्यावळीचे सुरवातीक आनी शेवटाक ‘वंदे मातरम’ हें राष्ट्रगीत वाजोवप वा गावप सक्तीचें करपाच्या निर्णया आड प्रस्न उबो केला. हो निर्णय अनावश्यक आनी लोकांक त्रास दिवपी थारतलो, अशें तांणी म्हणलां.
तिरुवनंतपुरमांत पत्रकारां वांगडा उलयतना थरूर हांणी सांगलें, ‘वंदे मातरम’ हें आमचें राष्ट्रगीत. तें गायले उपरांत आमी आदरान उबे रावतात. सामान्यपणान पयलीं हें गीत कार्यावळीचे सुरवातेक एकदां गातालें आनी उपरांत राष्ट्रगीत (जन गण मन) शेवटाक वाजयताले. पूण आतां नवी दिल्लींत उपराष्ट्रपती सी पी राधाकृष्णन हांचे हाजेरींतजाल्ले कार्यावळींत सुरवातीक आनी शेवटाक ‘वंदे मातरम’चें पुराय संस्करण वाजयलां. हें गीत लांब आशिल्ल्यान, दोनदां उबे रावप लोकां खातीर गैरसोयीचें आसा. तशेंच, संसदेन असो खंयचोय कायदो संमत केल्लो ना जो हें राष्ट्रगीत अनिवार्य करता, अशें तांणी सांगलें.
नवीं मार्गदर्शक तत्वां
केंद्र सरकाराच्या गृह मंत्रालयान ‘वंदे मातरम’ संदर्भांत नवी मार्गदर्शक तत्वां जारी केल्यांत. आतां सरकारी कार्यावळी, शाळा वा हेर औपचारीक समारंभांनी ‘वंदे मातरम’ वाजोवप सक्तीचें आसतलें आनी त्या वेळार दरेके व्यक्तीक उबे रावप बंधनकारक आसतलें.
आदल्या नेमां प्रमाण फकत पयलीं दोन कडवीं गायताले, पूण नव्या मार्गदर्शक तत्वां प्रमाण आतां ‘वंदे मातरम’चीं स (६) कडवीं गायतले. ताचो वट्ट काळ ३ मिनटां १० सेकंदां इतलो आसतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
