भांगरभूंय | प्रतिनिधी
केपे : लग्नाचे वेबसायटीचेर ऑनलायन जाल्ले वळखीचो गैरफायदो घेवन एके बायलेची वट्ट १.४५ लाख रुपयांची अर्थीक फटवणूक केल्ल्याची घडणूक केप्यां घडली. ह्या प्रकरणांत केपें पुलिसांनी गुन्यांव नोंद करून फुडलो तपास सुरू केला.
हे विशीं केप्यां पुलिसांनी दिल्ले म्हायती प्रमाण, केपेंचे एके बायलेन दिल्ले कागाळी प्रमाण ४ मेक सकाळच्या १० ते रातच्या ८ वरां मजगतीं दुबावीत देवा अरुण तशेंच हेर अनवळख्यांनी संगनमतान तिची फटवणूक केली.
सुरवातेक दुबाविताची कागाळदारा कडेन शादी डॉट कॉम (Shaadi.com) हे लग्नाचे वेबसायटीचेर वळख जाल्ली. उपरांत तांणी इश्टागत वाडोवन कागाळदाराचो विस्वास जिखलो आनी लग्नाचें फटींग आस्वासन दिलें. मुखार आपूण परदेशी चलना सयत विमानतळार आडकलां आनी आपल्याक बेगोबेग मजतीची गरज आशिल्ल्याचें सांगून दुबावितान कागाळदाराक विवीध बँक खात्यांत खुबशे वेव्हर करून १,४५,६०० रुपया जमा करपाक लायले.
आपली फटवणूक जाल्ल्याचें समजतांच बायलेन पुलिशेंत वचून कागाळ केली. ह्या प्रकरणाचो फुडलो तपास पुलीस उपनिरीक्षक योगेश गांवकार करतात.
मजगतीं, पलिसांनी नागरिकांक सोशल मिडियाचेर वा ऑनलायन लग्नाचे वेबसायटीचेर जाल्ल्या मनशाचे वळखीचेर दोळे धांपून विस्वास दवरचो न्हय. अर्थीक वेव्हार करचे पयली संबंदीत मनशाची चवकशी करपाचो उलो मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
