भांगरभूंय | प्रतिनिधी
पणजी : फाटल्या सप्तकांत प्रधानमंत्री नरेंद्र मोदी, गृहमंत्री अमित शहा आनी हेर केंद्रीय मंत्र्यांच्यो भेटी घेतले उपरांत मुख्यमंत्री डॉ. प्रमोद सावंत परत दिल्लीक गेले. शुक्रारा सत्ताधारी आमदार, मंत्री हांची जोड बसका घेतले उपरांत मुख्यमंत्र्यांची ही दिल्ली भेट जाता. सोमारा सकाळीं तांणी केंद्रीय रान आनी पर्यावरण मंत्री भूपेंद्र यादव हांची भेट घेवन शाश्वत उदरगतीचेर चर्चा केली. संघटनात्मक गजालीं विशीं बसके खातीर प्रदेश भाजप अध्यक्ष दामू नायक हेय दिल्लीक आसात. प्रदेश अध्यक्ष आनी मुख्यमंत्री दोगूय दिल्लींत आशिल्ल्यान रितें मंत्रिपद तशेंच विधानसभा वेंचणुके संबंदी म्हत्वाची चर्चा अपेक्षीत आसा.
येवपी विधानसभा वेंचणुकेची तयारी आनी संघटनात्मक गजालींचेर भाजपच्या केंद्रीय फुडार्यां कडेन चर्चा करपा खातीर हांव दिल्लीक आयलों. राष्ट्रीय अध्यक्ष नितीन नबीन, सरचिटणीस बी. एल. संतोष हांचे कडेन बसका जातली. हे बसकेक राज्यसभा खासदार सदानंद शेट तानावडे हाजीर रावतले, अशी म्हायती प्रदेश भाजप अध्यक्ष दामू नायक हांणी दिली. मुख्यमंत्री हेर कामां खातीर दिल्लीक आयिल्ल्याचें तांणी म्हणलें.
राज्यांत सध्या विवीध राजकीय घडामोडी वेगान जायत आसात. मनोज परब हांणी आरजी अध्यक्षपदाचो राजीनामा दिले उपरांत प्रदेश कॉंग्रेसींतूय नेतृत्व बदल केलो. प्रदेश कॉंग्रेसच्या अध्यक्षपदार अमित पाटकार हांकां काडून गिरीश चोडणकार हांची नियुक्ती केली. नोकरभरती तशेंच रित्या मंत्रिपदा विशीं सत्ताधारी आमदारां मदीं असंतोषाचें वातावरण आसतना मुख्यमंत्र्यांच्या दिल्ली वारीचो आंकडो वाडतूच आसा. फाटल्या सप्तकांत प्रदेश भाजप अध्यक्ष आनी मुख्यमंत्री दिल्लीक गेल्ले. उपरांत फाटल्या बुधवारा मुख्यमंत्र्यांनी दिल्लीक प्रधानमंत्र्या सयत हेर केंद्रीय फुडार्यांची भेट घेतली. चार दिसांनी आयज दिल्लीक तांणी केंद्रीय मंत्री भूपेंद्र यादव हांची भेट घेतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
