भांगरभूंय | प्रतिनिधी
पणजीः केंद्रीय वेचणूक आयोगान एसटी खातीर २०२७ विधानसभा वेचणूकेंत आरक्षण लागू करचें, अशी मागणी भाजपान मुखेल निर्वाचन आयोगाकडेन केल्या. मुख्यमंत्री डॉ. प्रमोद सावंत आनी प्रदेशाध्यक्ष दामू नायक हे आपल्या दिल्ली दौर्यांत हो प्रस्न मांडटले अशें गोविंद पर्वतकार हांणी सांगलें.
जनगणने उपरांतच एसटी समाजाक राजकी आरक्षण दिवचें अशी मागणी अखिल गोमंतक क्षत्रिय मराठा समाजान केल्ली. हे विशींचें निविदेन मुख्यमंत्री डॉ. प्रमोद सावंत आनी भाजप प्रदेशाध्यक्ष दामू नायक हांकां सादर केल्लें. राष्ट्रपती, पंतप्रधान, राज्यपालांक ह्या निवेदनाच्यो प्रती धाडिल्ल्यो.
हे फाटभूंयेर भाजपच्या शिष्टमंडळान आयज मुखेल वेंचणूक अधिकार्यांची भेट घेतली आनी आरक्षणाचे प्रक्रीयेक गती दिवपाची मागणी केली. ह्या वेळार भाजप कोअर कमिटीचे वांगडी गोविंद पर्वतकार, एसटी मोर्चाचे अध्यक्ष आनी झेडपी वांगडी मोहन गांवकार, झेडपी वांगडी अंजली वेळीप, धाकू मडकयकार, पुंडलीक रावत देसाय, सिध्दार्थ कुंकळेकार आनी सुभम म्हापसेकार शिश्टमंडळांत हजर आशिल्ले.
सगळ्या स्तराचेर भाजपान आपले यत्न करून एसटी आरक्षणाचो विशय फुडें व्हेला. आमी मुखेल निर्वाचन अधिकार्याक निवेदन भेट दिवन सांगलां, सगळी प्रक्रीया पुराय जाल्या. केंद्रान हें आरक्षण सगळ्या राज्यांनी लागू केलां आनी हे विशींचें विधेयक संसदेंत समंत जावन गोंय विधानसभेंत ह्या विधेयकाक तेंको दिवपी थाराव लेगीत घेतला, अशें पर्वतकार हांणी सांगलें.
हे विशींची वेचणूक प्रक्रीया आसा ती मुखेल निर्वाचन अधिकार्यान केंद्रीय वेचणूक आयोगाचे समन्वयान पुराय करची. येता ते २०२७ विधानसभा वेचणुकेंत आमचे एसटी भावांक आरक्षण मेळचें ह्या हेतान यत्न चालीक लावचे, अशी मागणी पर्वतकार हांणी केली.
सगळे समाजाचे प्रस्न भाजपान वेळा वेळार सोडयल्यात आनी होय प्रस्न बेगीनूच सुट्टोलो आनी एसटी समाजाक न्याय मेळटलो म्हण आमचे यत्न आसात. एसटी आरक्षण संदर्भात समन्वय सादपा खातीर मुख्यमंत्री डॉ. प्रमोद सावंत आनी प्रदेशाध्यक्ष दामू नायक दिल्ली गेल्यात, अशें पर्वतकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
